Predatory nga panggobiyerno

Miabot na og 63 porsiyento ang gidaghanon sa mga kabus sa nasud. Kini basi sa resulta sa Disyembre 12-18 nga survey sa Social Weather Station (SWS). Nganong midaghan man ang mga kabus sa nasud?

Maingon nato nga gituyo sa gobiyerno ang pagpadaghan sa kabus ug ang pagsaka sa gidaghanon sa kabus positibo kini alang sa gobiyerno nga usa ka predatoryo.

Ang gidaghanon sa mga kabus, kakuwang sa serbisyo, minus nga gahin alang sa edukasyon ug pagkusog sa dinastiya sa politika mao ang mga manipistasyon sa usa ka predatory governance.

Ang pagpadayon o pagpadaghan sa mga kabus tuyoon sa mga nagpadagan sa predatory nga pang gobyerno aron aduna silay mamanipola ug mapahimuslan ingon man mapalit panahon sa eleksiyon.

Tuyoon ang paghatag og dili maayo nga serbisyo aron daghan nga mga tawo ang magsige og pangayo og ayuda kay bation sa mga politiko nga sila ginoo, mura gyod og ilang kuwarta ang ilang gihatag nga ayuda.

Sa 2025 nga nasudnong budget, ang gobiyerno migahin og binilyon nga kantidad alang sa AKAP, AICS ug 4Ps.

Ang gobiyerno miiban sa gahin alang sa edukasyon. Dili gusto sa gobiyerno nga daghan ang maedukar aron dili modaghan ang magsige og pangotana kay makamao na.

Ang pinakadako nga timailhan sa predatory governance mao ang paglapad sa dinastiya sa politika.

Ang gobiyerno sa Pilipinas nahimo na kini nga negosyo sa pamilya ug ang posisyon nahisama sa propiedad nga gipanag-iya sa mga politiko. Mao nga bisan dili makamao tungod kay mao ra nga apilyido iboto ra gihapon sila sa mga tawo. Seguro sa dinastiya anaa sa mga tawo ang problema kay sila ang moboto.

Sa eleksiyon, hunahunaon unta sa mga botante ug isilsil sa ilang alimpatakan nga ang pagpili ibasi sa kapasidad ug dili sa personalidad. Ayaw pilia ang maayo nga tawo apan dili makamao. Ayaw pilia ang makamao pero dili maayong tawo. Maoy pilia ang maayong tawo nga makamao.

Kun gusto nimong dili dumalahon og predatoryo nga pang gobiyerno hunahunaa ninyo og maayo.