Sinulog ug kita

Nagkadaiya ang mga panahom sa katawhan sa dihang nahimong viral kadtong mga babaye nga nisayaw sa lansa dinala ang imahen sa Balaang Bata kang kansang sinayawan wala makapauyon sa kadaghanan. Daghan ang nihatag og bati inga komento.

Adunay nikutlo usab sa teksto diin si Jesus nagkanayon: “Kun si kinsa kadtong walay sala maoy paunaha og bato kaniya.”

Sa laing bahin anaa usab kadtong contingent nga nisayaw og APT dinala gihapon ang imahen sa Balaang Bata. Daghan gihapong mga pagsaway nga ilang nadawat kuyog na niini ang mga panghimaraut.

Usahay kitang mga tawo sa ngalan sa arte ug pagkamamugnaon kun creativity ang mo trespass usahay sa boundaries.

Anaa ang sense of the sacred apan daghan lang gyud ang niuran niini. Daghan ang nisud-ong sa bisan unsang balansayon ingon nga self -expression lamang apan halayo sa pagtuo.

Sa laktod nga pagkasulti relative ra kaayo ang pagtan-aw halos tanang mga butang.

Sa laing bahin usab atong gihimong uran bisan gani ang mga butang sagrado. Nakalimot kita nga ang Sinulog dili lang sayaw ni pasundayag o tigi sa mga dance steps ug choreography.

Ang sinulog matang sa pag-ampo alang natong mga Sugboanon busa bisan pa man kun sayaw kini apan pagpadayag kini sa atong pagtuo busa walay luna ang bisan unsang matang sa bugal bugal ni yaga yaga.

Unta makaamgo na kita niini ug sila nga nagbuhat sa ingon kaloy-an unta kamo sa Dios, pasayloon kamo sa inyong mga sala.