EDITORIAL - Viva Pit Senyor!

Pit Senyor! Mao kini ang naa sa mga hunahuna ug kasing-kasing sa mga Sugbuanon dinhi sa Sugbu, apil sa nangatakdan ang mga dumuduong ug mga bisita nga naagni na pag-anhi dinhi kada tuig matag kapistahan sa Balaang Bata, apil na sab ang mga bag-o pa nakasuway ani.

Karong semanaha lang, nasinati sa Sugbu ang pagsige og uwan-uwan matag karon ug unya, dili lang basta uwan, usahay mobundak gyud og kusog.

Apan bisan pa niini, wala magpapiri ang mga Sugbuanon sa ilang debosyon ngadto sa Senyor Sto. Niño. Nituman gihapon ang kinabag-an sa ilang mga panaad nga pagdayeg, pagsayaw ug pag-awit para sa Niya.

Kadaghanan sa mga Sugbuanon dako og pagsalig ug pagtuo sa Senyor Sto. Niño, kun ang mga kaparian pa maoy pasultihon, ang Balaang Bata maoy paglaum sa tanan mao nga dili ikahibulong nga gisuklian Niya og grasya ang mga Sugbuanon sa tanang panahon.

Gani dunay mga panghitabo nga ang mga deboto ra gyud maoy nakahubad ug nakasabot sa panahon sa mga kalihokan nga diin dili maayo ang dagan sa panahon. Bisan unsa ka kadag-om sa kalangitan, ini og guwa sa imahen mokalma man gyud.

Apan sa tawong kuwang sa pagtuo o dili magtutuo, dili kadto milagro o walay divine intervention nga nahitabo kay alang kanila kinaiyahan ra maoy nagdiktar sa panahon. Nakalimot sila kun kinsa ang nagbuhat sa kinaiyahan.

Karong adlawa mao ang kapistahan gyud sa Senyor Sto. Niño, sa uban ang importanteng  unang buhaton karon mao ang pagsimba. Pagpasalamat sa kaayo ug grasya sa Kahitas-an ug sa samang higayon makapadangat sab sa mga intensiyon ug petisyon alang sa dugang grasya.

Mao kini ang sinugdanan sa tanan, ang pista ug dili ang kulturahanong kalihokan nga namugna tungod gihapon sa kapistahan sama anang Sinulog.

Pakapin nalang kanang pagtan-aw sa Sinulog Grand Parade kay tibuok adlaw bitaw ning buhaton karong adlawa. Ang pagsimba, molanat ra og usa ka oras.