Dili igo ang pamalikas

Alang kang Senador Juan Miguel Zubiri, angayan na’ng mamalikas si Presidente Marcos, Jr. tungod sa padayon’g pagsaka sa presyo sa mga agriculture commodities.  Dugang pa ni Zubiri, dili na kinahanglan magpanday og dugang mga balaod ug nga ang kinahanglan lamang mao ang political will pagpatuman niini.   Kon buot hunahunaon, dili igo ang pagpamalikas lang.  Tinuoray nga paglutos sa mga cartel ang angayan’g buhaton.  Tataw nga kunsabo ang mga cartel ug ubang opisyales sa kagamhanan.  Haum ang panultihon nga “Usahay ang atong higpit nga kaaway, mao kadto’ng mga tawo nga suod sa atong dughan.”  Fezteleern!

 Band aid nga solution

Gitun-an sa DSWD ang pagdugang og mga “Walang Gutom” kitchens sa mga pili’ng lugar sa Metro Manila.  Ang programa gitumong sa paghatag pagkaon sa gibanabana nga 12,000 ka mga benepisyaryo.  Daghan ang mga programa nga gipatuman sa gobyerno alang sa mga kabos apan sagad niini, dili malungtaron ug daw band aid solution lang sa kakabos sa katawhan.  Angayan tamdan ang panultihon nga, “Kon hatagan mo’g isda ang tawo, makakaon siya sa usa ka adlaw, apan kon tudloan mo siya sa pagpangisda, makakaon siya sa tibuok niya’ng kinabuhi.”  Muleeng!

 Ligas ang spelling

Segun sa pamahayag ni Presidente Marcos, Jr., gipanglantawan nga modeklarar ang Department of Agriculture (DA) og national food emergency sa tumong nga mapugos pagpakunhod ang taas nga presyo sa bugas.   Daghan na ang mga solusyon nga gibuhat sa gobyerno aron makunhoran ang presyo sa bugas.  Apan ligas ug pingis ra kini nga mga solusyon ug wala gyud mosulbad sa suliran.  Makapahinumdum sa bana nga sa dihang gipangutana niya ang iyang asawa kon gusto ba kini og utan isip sud-an, mitubag ang asawa nga, “Hala uy, giligas pa gyud niya ang spelling.”  Pagkatoytoy!

 Kaon og exotic

Bisan sa ka-abunda sa suplay sa manok dinhi sa rehiyon, pabilin nga taas ang presyo sa maong commodity dinhi sa Sugbo gumikan kay misaka usab panginahanglan ingon man ang production costs.  Gikan sa P170 matag kilo sa wala pa ang holiday season, miabot na karon sa P210 ang kilo sa manok.  Ni’ng kahimtanga, kinahanglan nga magkat-on ang tawo pagkaon sa ubang pagkaon nga tinubdan sa protIna.  Sugyot sa akong amigo, “Magsugod na kita pagkaon og mga exotic nga pagkaon sama sa batod, kapan, kagang, bakukang, baki, ulod ug uban pa.” Madahaan!

 Dili mawagtang ang titulo

Mipasaka og disbarment case batok kang kanhi Presidente Rodrigo Duterte ang human rights group nga Karapatan, kaubang ang daghang human rights advocates ug mga religious leaders, sa pasangil nga nakalapas si Duterte sa Code of Professional Responsibility and Accountability.   Wala na kini hinungdan kon buot hunahunaon kay una, tigulang na si Duterte, ug ikaduha, wala man idungog nga mi-practice pa karon si Duterte sa iyang propesyon pagka-abogado.  Matud pa sa akong amigo, “Bisan molampos pa sila pag-disbar ni Duterte, ang title nga Attorney ra ang ilang natangtang apan ang labing labaw nga titulo nga mao ang pagka-presidente sa nasud, dili na gyud nila malangkat.”  Saoonz!