Mas maayong kapilian
Dakong baligho, o ebidensiya nga ang ilang sulti gisukwahi sa ilang buhat:
• Nagpabiling supak si Presidente Ferdinand Marcos Jr. sa impeachment ni Bise Presidente Sara Duterte bisan sa pasidaan ni Presidential Legal Counsel Juan Ponce Enrile nga pagpaundayon sa kawsa sa Iglesia ni Cristo (INC) dakong kalapasan sa konstitusyon; samtang
• Uyon si Bise Presidente Duterte sa impeachment process kay kahatagan siya og higayon sa pagpanalipod sa iyang kaugalingon nga dili na maduhig ang walay labot nga mga opisyal sa Office of the Vice President (OVP) ug Department of Education (DepEd).
* * *
Ang kasalikwaot sa pagsupak sa presidente sa impeachment nga gipaboran sa gipuntiryang opisyal kalabwan lang sa kalahi sa aktuwal nilang gihimo:
• Gidasig sa presidente ang pagpadayon sa mga imbestigasyon sa House of Representatives nga nakahipos sa mga ebidensiya nga gipasikaran sa nagpakabana nga mga grupo nga niawhag sa impeachment sa bise presidente; ug
• Gihulga sa bise presidente nga patyon ang presidente, first lady ug House speaker human giisnab ang budget deliberations ug gilikayan ang mga imbestigasyon kay kumbinsido nga hapin lang sa dugay nang giplano nga impeachment batok niya.
* * *
Samtang padayong nagpaka-aron-ingnon nga nituo sa ilang istorya, pulos nitibugsok ang ilang ratings sa national surveys:
• Kay ang bise presidente napakyas pagpasabot sa pagkahurot sa P612.5 milyones nga confidential funds sa OVP ug DepEd ug nagdumili sa pagtubag og mga pangutana giunsa niya paggasto ang buhis sa katawhan; ug
• Kay ang presidente niaprobar sa pagmaniobra sa 2025 budget ug napakyas pagsulbad sa kamahal sa bugas humay ug ubang inadlaw nga mga panginahanglan.
* * *
Hinaot nga ang kaamguhan sa kinabag-an sa katawhan nga walay mapili sa presidente ug bise presidente makakumbinser nila nga:
• Mas maayong alternatibo ang pagpangita og mas tarung, mas ligdong, mas takos ug mas kasaligan nga mga lider kay sa pagdaginot sa pagpili kinsay mas mubo og sungay sa nag-unay nga mga puwersa sa kangitngit ug kadaotan; ug
• Mapatuman lang ang makiangayong kausaban ug makab-ot lang ang mas hayag nga ugma kon maghiusa ug magkasinabtanay sila pinaagi sa pagpadaplin sa taphawng mga butang nga nakapabuak nila ug sa pagtutok sa mas importanteng mga kawsa nga makabugkos nila.
* * *
- Latest
