Andam ka na ba?

Makapanlimbawot sa balhibo ang gidangatan sa Los Angeles, California diin tibuok syudad ang nasunog. Way giliatan ang kayo, bisan ang mga mansion nga gipanag-iya sa mga inila ug adunahang tawo sa kalibutan nga hitsas sa panagang sa sunog nangaugdaw.

Ang nindot nga mga talan-awon didto sa mga sikat nga dapit sama sa Hollywood Hills sa Palisades ug Malibu gipulihan sa makalilisang nga hitsura nga matandi sa hulagway sa impyerno.

Bisan giunsa sa kabomberohan sa maong dapit pagpaningkamot aron mapugngan ang pagkuyanap sa sunog, ang tanan nakawang.

Kapin na sa semana sukad miulbo ang sunog nga hangtod ron wala hibaw-i sa mga imbestigador ang hinungdan, apan wala pa ni hingpit nga mapawong.

Lisud sabton nganong taliwa sa kaabante sa ilang teknolohiya ug kahimanan pagpawong sa sunog, nganong napakyas ang kabomberohan sa labing gamhanan nga nasud sa kalibutan pagkontrolar niini.

Kun imong tan-awon ang dapit nga gilamoy sa kayo, lisod gyud nga tuohan nga mokuyanap kini ug makaapekto ug ingon kalapad sanglit pinuy-anan sa mga adunahan ang mga apektado ug wala magsikit ang mga panimay ug edipisyo.

Kun mapakgang sa atong kabomberohan dinhi sa Sugbo ang mga sunog sa dapit nga nagsikit ang mga panimay ug gama pa gyud sa mga light materials, ambot nganong wala mahimo sa kabomberohan didto sa California.

Wala pa sukad mahitabo dinhi sa ato nga dunay ingon ini ka lapad nga sunog sa mga dapit nga gipuy-anan sa mga adunahan.

Kun duna may masunog sa mga dapit sa adunahan daghan na ang duha ka panimay.

Busa tungod niini, dili kalikayan nga makapangutana ta kun ang nahitabo sa California katumanan ba sa tagna diha sa Bibliya? 

Ang hitabo sa maong dapit makapaninumdom nato sa sugilanon sa syudad sa Sodom ug Gomora sigun sa mabasa sa Genesis 18-19 nga gisunog sa Diyos tungod sa grabing pagpakasa sa mga molupyo.

Bisan unsay imong relihiyon, ang hitabo nagpahinumdom nato nga ang Diyos hapit na mobalik ug gikinahanglan ang pagpangandam sa atong kaugalingon.

Andam ka na ba sa iyang pagbalik?