EDITORYAL - Background check sa mga kandidato

Gitutokan karon sa Armed Forces of the Philippines (AFP) ang pag-monitor sa posibleng pagpang-impluwensiya o pagpanglawgaw sa ubang mga nasud sa May 12 midterm elections mao nga niapil sila karon sa pag background check sa tanang mga kandidato.

Hinuon gipasalig sa AFP nga ang resulta sa ilang background check dili kini ibutyag ngadto sa publiko kondili ang Commission on Elections maoy mohimo og desisyon bahin aning mga kandidatoha.

Apil sa sutaon kun tinuod ba nga mga Filipino ang kandidato.

Tingali dili na buot sa AFP mahitabo ang nahitabo sa kaso ni dismissed mayor Bamban mayor Alice Guo nga nakompirmar sa National Intelligence Coordinating Agency nga usa ka Chinese national u gang tinuod pangalan Guo Hua Ping ug gidudahan siya nga espiya sa China.

Gikonsiderar siya sa NICA nga “agent of influence” ug gigamit niya ang iyang posisyon aron impluwensiyahan ang opinyon sa publiko ug paghulma og mga desisyon nga ang mabulahan mao ang nasud nga nagpadala kaniya dinhi.

Maayo kini nga lakang sa AFP kay lisud na nga duna na say espiya sa ubang mga nasud, ilabi na sa China, nga makahupot og posisyon sa gobiyerno tungod kay dako kining hulga sa seguridad sa nasud.

Angay ba kahang mabalaka ang mga Pilipinong kandidato nga nagdala og apelyedo nga banyaga paminawon? Kung kompleto lang gyud og papeles ilabi na sa birth certificates ug duna gyuy rekord niini sa gobiyerno dili kinahanglang maalarma.

Kay lahi sa nahitabo kang Guo, walay klarong rekord sa Philippine Statistics Administration, walay rekord sa Department of Health, walay rekord sa DepEd o sa bisan unsang eskuylahan nga giila sa gobiyerno ug uban pa.

Kwestyonable sab ang pagkaadunahan niini ug background sa iyang pamilya nga mura og mga uhong nga nisulpot dinhi pipila ka tuig na ang nakalabay ug nakaangkon og mga negosyo dinhi ug si Guo nahimo pa gyung mayor.

Kung duna man nasud nga kinahanglang bantayan og maayo, kini mao ang China nga nagtinguhang ilugon ang West Philippine Sea sa Pilipinas.

 Dugay na dunay mga Chinese dinhi, apan mas nakagamot sila og maayo ug nakaimpluwensiya og dako dinhi sa Pilipinas sa panahon sa administrasyong Duterte.