Kalinaw sa paglingiw
Kumbinsido si Bise Presidente Sara Duterte nga ang imbestigasyon sa Committee on Good Government sa House of Representatives sa mga transaksiyon sa iyang confidential funds (CF) sa Office of the Vice President (OVP) ug Department of Education (DepEd) wala itumong sa pagbadlong sa pagpangawat.
Kay mas dako ang kawat sa mga alyado sa administrasyon. P612.5 milyones ray iyang CF samtang P26 bilyones ang Ayuda sa Kapos ang Kita Program (AKAP) ug P288 bilyones ang pork barrel projects nga gi-parking sa Department of Public Works and Highways (DPWH).
* * *
Maong wala siya motarung og tubag sa mga pangutana dihang gituki sa House ug sa Senado ang budget sa OVP sa 2025. Maong nilikay ug gipatago ang iyang mga sinaligan sa imbestigasyon sa mga kongresista sa mga binuang sa iyang CF nga nasakpan sa Commission on Audit (COA).
Kay dili siyang kapasabot nganong nahurot ang P125 milyones nga CF sulod lang sa 11 ka adlaw niadtong 2022. Samang dili katubag nganong walay rekord sa Philippine Statistics Authority (PSA) ang 1,322 sa 1,992 ka recipients nga gipapirma og acknowledgment receipts.
* * *
Nisuway siya pag-usab sa istorya. Gipasanginlan niya si House Speaker Martin Romualdez ug House Appropriations Committee Chairperson Zaldy Co sa pagmaniobra sa nasudnong budget. Ginganlan niya si First Lady Liza Araneta Marcos nga maoy nanghatag og kuwarta sa mga opisyal sa DepEd.
Pero nakumbinser ang publiko sa kalig-on sa mga ebidensiya batok niya. Maong nitibugsok ang iyang trust ug approval ratings sa surveys sa tulo ka sunudsunod nga quarters sa 2024. Wala katabang ang iyang hulga pagpatay sa presidente, speaker ug first lady.
* * *
Kumbinsido sab ang bise presidente nga seguro siyang ma-impeach sa House ug makonbikto sa Senado kon busgon sa administrasyon ang ilang mga alyado. Nga makapahagsa sa iyang ambisyon nga mag-presidente sa 2028 aron makabalik ang ilang pamilya sa Malakanyang.
Maong nidangop siya sa Iglesia ni Cristo (INC). Nga nakatapok og kapin sa milyon gahapon sa rally nga gipatuong niawhag og kalinaw. Nanghinaot siya nga ang mga opisyal sa administrasyon makugang sa napakita nga dakong puwersa. Ug mouyon na lang nga ang kalinaw nagkahulogan og paglingiw sa ilang mga kinawatay.
* * *
- Latest
