De center

Adunay laang nga gipaon sa kadaghanan kanato. Kining maong laang nakasentro sa atong kaugalingon gyud mismo.

Taas kaayo kita og panlantaw sa atong kaugalingon, atong giisip ang atong kaugalingon nga mahinungdanon kaayo ug atong gihimo ang atong kauglaingon ingon nga sukaranan sa atong paghukom sa ubang mga tawo.

Dugang pa niini, nahimo kitang obsessed kaayo sa atong kaugalingon as if wala nay lain pa.

Si San Juan dela Cruz ang nagdasig kanato nga atong hukman ang atong kaugalingon ingon sa angay uban ang pagsud-ong niini uban ang mga paag-angkon sa atong kasaypanan, sa atong mga kahuyangan, sa atong mga sala ug sa atong kapakyasan.

Dili tungod kay dili himsog ang atong panlantaw sa atong kaugalingon kondili aron malikayan nato ang pagpagarbo nga maoy makapalayo nato gikan sa Dios. Sama sa yawa nga nidumili sa pagyukbo sa Dios gumikan sa naghinobrang garbo.

Ang pamaagi sa decentering makatabang aron mabansay nato ang pagkamapaubsanon apan wala mahanaw ang atong kaugalingon.

 Dugang pa, ang maong pamaagi makatabang diha sa matag panlimbasog nga pinasikad sa atong pagsabot sa kamatuoran nga dunay limitasyon ang tanan, lakip na niini ang atong kamatayon.

Kining maong kamatuoran magpugong kanato sa pagbuhat  og mga lakang nga dakong sukwahi sa kabubut-on sa Dios. Sa abog kita gikan ug sa abog kita pauli.

Ang pag-angkon nga kita dili maoy tag-iya bisan sa atong kinabuhi sukaranan man sa atong tagsatagsa ka kalingkawasan.

Daghang mga higayon nga kita mamatay sa atong daang pagkatawo apan kadaghanan kanato ang nikagiw gikan niini mao nga hangtud karon daghanan kanato ang matawag gihapon nga wala makahamtong ug makatubo diha sa birtud.