Comelec mipapiliik

Pagsugod nag imprinta sa mga balota alang sa pangalan sa 2025-midterm-election candidates, may usa ka lumansaray sa pagka congresswoman sa 1st District sa Tacloban City, Nene Bacale, mitawag ni Representative Rodante Marcoleta ug mipahibalo nga wala iyang ngalan sa balota.

Si Bacale, gisaludohan sa mga taga Tacloban City tungod sa iyang kaisog nga moparang sa gamhanang House Speaker Martin Romualdez, kinsa naglunang sa daghang salapi nga magamit unsaon pagdaya ang piniliay, diin wala pa gani magsugod ang kampanya, nagpunay nag panghatag og ayuda sa nagkalainlaing dapit sa Pilipinas, bisag walay nahitabong kalamidad.

Sulod sa daghang katuigan nga gigunitan ni Martin ang Tacloban City, wala g'yud makatilaw og kaayohan ang mga lumolupyo. Walay lig-ong inprastraktura nga napabarog ug ikapanghambog. Gani, matud pa sa usa ka Tacloban City vlogger, ultimo ilang merkadong walay tagad, puwerte mang hugawa.

Gumikan niini, hagbay rang gisuka si Martin sa mayoridad nga botante sa Tacloban City. Ug nagkasinabot nga suportahan g'yud nilag toda si Bacale sa pagka-congresswoman ning umaabot 2025 midterm election.  Samot na, kay giendorso kini ni Tatay Digong.

Apan naunsa ba, nga wala man mahiapil ang ngalan ni Bacale sa naimprinta nang balota sa Comelec? Hastang ubang mikandidatong makig-atbang ni Martin nahanaw?

Sa laktod, ngalan ra ni Martin Romualdez ang nahabilin? Diin, daw nagpasabot nga wala kini laing kontra, busa segurado nang modaog ug makapadayon sa pagpangurakot?

Hinuon, basig nataligam-an lang ug may kahigayonan pa ang hingtungdan nga moreklamo sa Comelec aron kini makorehian.

Ang makasugsog sa balatian, kay nangatarungan si Comelec chairman George-Erwin Garcia, nga dili kuno registered voter si Bacale sa maong distrito nga gilansaran. Hinungdan, na-disqualified.

Ubay-ubay'ng abogado ang mibatikos sa Comelec. Naaprobahan na man ang Certificate of Candidacy ni Bacale human sa makuting pagtsek-ap. Unya, nganong sa adlaw'ng maoy pag-imprintag sugod sa mga balota, ilang gitangtang, diin wala gani padad-ig notice of disqualification si Bacale?

Tungod ba, kay sa maong adlaw ra nila nasayran nga kini dili registered voter sa 1st District? Nan, kang kinsa man kining sayop? Dili ba sa Comelec? Unya nganong si Bacale man ang pahamtangag disqualification? 

Basta, kining linuog pamaagi sa Comelec, sa tanang pro-good governance Filipinos, mipapiliik-mipatiyabaw: “George Garcia, resign!”