Peke nga alinaw

Para sa kadagkoan sa Iglesia ni Cristo (INC), sa walay pagkonsulta sa mga sakop sa tinuod nga kawsa sa ilang rally karong adlawa, makab-ot ang nasudnong kalinaw kon imbes mag-away magtinabangay silang Presidente Ferdinand Marcos Jr. ug Bise Presidente Sara Duterte.

Sa ato pa, gusto nilang banhawon ang UniTeam. Nga sila mismo nahibawo imposibleng mahitabo. Kay daghan nang mga hulga ug mga insulto nga naluwatan. Ug mas daghang mga ebidensiya sa extrajudicial killings (EJKs) ug ubang bangis nga mga krimen ug lapad nga pagpangawat ug pangabuso sa gahom ang nadiskubrehan.

***

Ang awhag sa kalinaw sa INC, nga gidasonan sa sipsip nga mga politiko, matuman lang kon kalimtan sa buot ang awhag sa mga Duterte:

•Pagpalagpot ni Marcos Jr. sa gahom (aron makapuli ang bise presidente sa Malacañang) pinaagi sa pagbakwi sa militar ug kapolisan sa ilang suporta sa administrasyon; ug

•Pagpatay ni Marcos Jr., House Speaker Martin Romualdez, ug first lady Liza Araneta Marcos kon mamatay ang bise presidente (sa walay paghisgot sa nahaunang hulga pag-ugkat sa patayng lawas ni Ferdinand Marcos Sr. aron ibalibag sa West Philippine Sea).

***

Aron mapatigbabaw ang kalinaw nga gipamugos sa INC, kinahanglang ibasura ang mga ebidensiya nga nahipos sa House of Representatives sa:

•EJKs sa drug war ni kanhi presidente Rodrigo Duterte nga gidudahang gitumong pagpapas sa mga karibal sa sindikato sa drugas nga gipasangil nga gipangulohan nilang kanhi presidential economic adviser Michael Yang, Kongresista Paolo Duterte, ug Atty. Mans Carpio; ug

•Gidudahang pagbolsa sa ?612.5 milyones nga confidential funds sa Office of the Vice President ug Department of Education.

***

Bugti sa pagpasaylo sa mga Duterte, ang ideya sa kalinaw sa INC naglakip sa paghunong sa pagtuki sa mas dagkong kawat nga gipasangil batok sa administrasyon:

•Higanteng mga laslas sa 2025 budget sa Kahimsog, Edukasyon, Kakabos, ug Agrikultura aron pagseguro sa makalilisang nga pagburot sa ayuda ug pork barrel projects nga gamiton sa mga politiko pagpamalit og mga boto; ug

•Mas lisod ipasabot nga pagkatilok sa ?9 bilyones nga confidential ug intelligence funds sa Office of the President sa 2023 ug 2024 (nga gipun-an na sab og ?4.5 bilyones karong tuiga).