EDITORYAL - Basurahan, portalets  andama

Dako-dakong sagubangonon unya atol ug pagkahuman aning mga kalihokan sa Pista Senyor ug sa Sinulog ang mga magtipun-og nga basura nga dili maato hipos sa mga gipangtahasan pagbuhat niini tungod sa kadaghan.

Gawas pa niana, maayo unta og dunay kadaganan nga pansayan ang publiko diha sa kadalanan kay siguro sab nga dili tanang establisamento ang motugot nga gamiton ilang mga pasilidad sa mga dili kustomer.

Sa mga nangaging mga Sinulog, gatosan gyud ka toneladang basura ang pirmeng mahipos gikan sa kadalanan. Karon, sigurado gyud nga mao gihapon kini ang mapaabot.

Gani karon palang, samtang tuod adunay mga magbalantay nga gipakatap diha sa kadalanan sama sa palibot sa Basilica Minore del Sto. Niño matag misa Novena, naa gyud gihapoy mga basurang makita nga gibilin ang mga manimbahay.

Ang uban naa gyud mismo sa dalan ug dunay uban nga ipangsuksok lang sa kilid-kilid sama sa plastic bottles, plastic cups, putos sa tsitseriya ug uban pa.

Usa sa kakuwangon man gud, samtang tinuod daghang nagbantay, kuwang man sab kaayo ang mga basurahan diha sa palibot.

Mao ra gihapon unya kini ang mahitabo ini og Sinulog karong Enero 19, kuwang ang mga basurahan nga makita aron mabutangan sa mga biya sa tawo mao nga anha lang gyud kini pamiyaan.

Ug aron mapitol gyud ang mga tawo kun duna gyuy ipakatap nga magbalantay, mas maayo nga otomatiko silang pabayron sa multa sa ilang kalapasan aron motagam ug makatimaan nga seryuso gyud ang siyudad.

Kaning mga establisamento kinahanglan magbutang og dakong basurahan sa gawas sa ilang pwesto aron dunay malabayan og basura ang mga tawo. Mas maayong dako gyud kini kay aron dili dayun mapuno.

Si Mayor Raymund Alvin Garcia mipagawas na og executive order nga kinahanglang tugotan sa mga balay patigayon ang mga dili nila kostumer nga makagamit sa ilang pansayan.

Mas labing maayo kun dunay daghang portalet o portable toilets nga kadangpan ang mga tawo diha sa mga dalan nga mentinahon gyud tibuok adlaw aron dili manimaho ug moawas.