Baha sa kuwarta
Daghang nahibulong dihang nikuyog ang mga kongresista sa Sugbo ni House Speaker Martin Romualdez ngadto sa Siquijor. Lisod igkita sa mga molupyo sa ilang mga distrito, nganong nagpanon man sa isla nga wala silay labot?
Nipasabot ang mga kongresista nga nisuporta sila sa liderato ni Romualdez atubangan sa mga pagsaway batok sa ilang institusyon. Pero nitumaw ang laing kahulogan sa ilang biyahe atubangan sa bag-ong pasangil ni Baguio City Mayor Benjamin Magalong nga ang mga kongresista nag-ilog sa pagkuyog ni Romualdez tungod sa gisaad nga minilyon ka pesos nga premyo.
* * *
Nahibaw-an ni Magalong gikan sa kapin sa gatos niya ka kauban sa Mayors for Good Governance (M4GG) nga nagbaha ang kuwarta sa mga kongresista sa ilang mga lugar samtang nagkaduol ang eleksiyon karong Mayo. Nasubay nila nga ang pundo gikan sa “7-7-7” nga giingong gihatag ni Romualdez ngadto sa kada kongresista nga nikuyog sa iyang mga lakaw:
• P7 milyones sa AKAP (Ayuda sa Kapos ang Kita Program);
• P7 milyones sa AICS (Assistance to Individuals in Crisis Situation); ug
• P7 milyones sa TUPAD Tulong Panghanapbuhay sa ating Disadvantaged/Displaced Workers).
* * *
Ang pagduaw ni Romualdez sa nagkalainlaing bahin sa nasud gipasangil sa Bagong Pilipinas Serbisyo Fair (BPSF) nga usa sa sentrong kalihokan mao ang pagpanghatag og kuwarta ug bugas ngadto sa tanang nanambong ubos sa Cash and Rice Distribution (CARD).
Pero gidudahan nga kabahin na sa sayo niyang pangandam pagtuman sa iyang ambisyon nga modagan sa pagka presidente sa 2028. Kana, kon dili na gyod makalusot ang charter change (cha-cha) nga mohimo niyang primero ministro.
* * *
Matud ni Magalong ang nakakuyog og usa ka biyahe nakadawat og P21 milyones. Ang nakauban og upat ka biyahe dunay P84 milyones. Maong mosugyot ming pangutan-on parte sa expose ni Magalong ang mosunod nga nalistang kuyog ni Romualdez sa Siquijor:
Cutie Del Mar, (Cebu City, 1st district); Edu Rama (Cebu City, 2nd district); Edsel Galeos, (Cebu Province, 2nd district); Pablo John Garcia (Cebu Province, 3rd district); Janice Salimbangon (Cebu Province, 4th district); Daphne Lagon (Cebu Province, 6th district); Peter Calderon (Cebu Province, 7th district); Lolypop Ouano (Mandaue City lone district); Cindi Chan (Lapu-Lapu City lone district); ug Sonny Lagon (Ako Bisaya Partylist).
* * *
- Latest
