Mamahimo bang papirmahon og deed of sale ang tag-i sa giprendang nga yuta?
Dear Atty. Divine,
Ang among yuta giprenda sa akong ginikanan og P500,000.00. Dapat bayran ang maong utang sud sa lima ka tuig. Mipirma ang akong papa og kasabutan uban sa iyang giprendahan. Human sa lima ka tuig napakyas ang akong ginikanan sa pagbayad sa maong utang. Gusto sa akong papa nga ibaligya nalang ang maong yuta ug ang mopalit niini mao ra sab ang giprendahan. Mamahimo ba nga mopirma og Deed of Absolute Sale si papa alang sa pagbaligya sa maong yuta ngadto sa iyang giprendahan? Daghang salamat. -- Samuel
* * *
Dear Samuel,
Basi sa Article 2085 sa atong Civil Code kini nagdili sa creditor sa pagpanag-iya sa butang nga gi pledge o gi mortgage. Apan kun ang imong papa maoy midesisyon nga ibaligya nalang ang maong property ngadto sa iyang giprendahan then mamahimo kini niyang buhaton basta magkasinabot sila sa presyo. Ang gidili lang sa atong balaod kanang automatic nga ibalhin ang ownership sa property ngadto sa pangan sa giutangan kun di sila makabayad sa nagprenda. Apan sa kaso sa imong papa, dili man automatic ang pag-transfer sa ownership niini kondili iya mang ibaligya ngadto sa giprendahan so legal kining maong paagi. Thank you and God bless!
Atty. Divine
* * *
Alang sa inyong pangutana, palihug lang sa pag e-mail sa [email protected] ug akong tubagon ang inyong pangutana pinaagi sa akong column.
- Latest
