Father Big Heart

Kong ang pari na gani ang makahimo og lihok nga dili magustohan sa mga tawo sa simbahan kuninitan dayon sa saway ilabi na karon sa kalibutan sa social media. Apan gusto nako ipaambit ang gihimo sa usa ka pari sa dakbayan sa Lapu-Lapu sa usa ka kasal nga akong natambungan niadtong nakalabay’ng adlaw. Nakadayeg ko sa iyang gihimo tungod kay siya mismo ang ninaug sa altar ug personal nga gi-assist ang couple atol sa pagpasao sa bride kauban ang ginikanan niini.

Ang nahitabo samtang nagbarug ang pari sa altar nakita niini ang pagpaso sa bride nga hinay tungod usab sa sitwasyon sa inahan niini nga maglisod na sa paglakaw tungod sa katiguwangon. Tungod sa kaluoy ni Father nikanaug kini sa altar ug iyang gi agbayan ang groom giuban ang groom's man dayong gisugat nila ang bride.

Gipaagak ni Padre ang inahan sa bride ngadto sa lingoranan niini samtang gigiyahan niya ang couple sa angayan nga himoon, gani duna pay higayon nga siya ang nitarong sa buda sa bride hangtud nga naabot na sila altar. Sa wala diay ang pagpaso sa bride siya na ang nag guide sa mga tibuok entourage lakip na ang mga wedding sponsors nga kinahanglan nga moduko mo vow atubangan sa altar.

Nakita nako nga sinsero ang pari sa iyang gihimo kay mapahiyomon man siya nga nagbuhat niini, lahi man kong gihimo niya kay gisapot siya nagdali siya apan gihimo ni Padre ang pag guide sa proseso sa kasal nga gaan sa iyang kabubot-on. Mao kana akong nakita ug ako ra pugd gitoohan nga dunay dako nga kasing kasing ang pari ngadto sa katawhan nga nikanaug sa pedestal ug nangunay sa pag atiman sa mga tawo.

Dili man perpekto ka buotan si Padre kay nagyawyaw man usab kini dihang nabantayan niya nga ang mga nanambong sa simbahan halos nag gamit og cellphone kay nag video, gusto unta niya nga tim-os nga pag ampo ang ihalad sa mga tawo ngadto sa kaslonon.

Bisan ang mga bata nga abay sa kasal iyang gitudloan sa mga angayan nga pagabuhaton. Ikaw nga nagtan-aw mora’g nitambong pud ka og seminar workshop nga adunay mga makat-onan sa mga leksyon sa kinabuhi. Usahay hait ug pintok ang pulong sa Pari nga molapos sa kasingkasing.

Kong ang ubang pari mangasaba kay nasuko nga na-late ang couple, gani dunay nag-viral didto sa

Negros Oriental nga samtang nagpaso pa ang bride nagsugod sa misa ang pari hinungdan nga gapandol pandol intawon ang bride aron lang makaabot sa altar. Aduna usay mga pari nga wala pa gani nahuman ang kanta sa pagtapos sa misa nawangtang na ang pari dili na mohuwat nga unta magpahulagway pa man ang mga tawo.

Gi-post nako kining expierince sa social media, kadaghanan nakadayeg sa maayong gawi sa pari apan dunay pipila ka mga tawo mga perting paita nga nakasaway sa gihimo sa pari. Pastilan maayo gyung pangtuslokon ang mga kalimutaw nga mangita gyud og ikasaway. Kong ang pari buotan ingnon nga nagpasikat, kong maldeito pud panghimarauton. Kining utoka wala gyuy niy sulod pulos duga sa panyawan ka pait.

Inay daygon ang gipakitang kaaghop sa kasing kasing sa Pari sa simbahan sa Marigondon, gisaway naman hinoon. Sige lang Padre ang Ginoo nalang ang mag igo kanila. Bitaw kong ingon ani pa lang ang kinaiya sa pari ganahan gyud ang mga tawo nga mosimba og mobalik sa Ginoo.

Kadtong mga feeling holy nga nang bash kang Padre pahuway lang sa mo kay inig mata ninyo nausab na ang inyong pagkatawo.