Sad-an ba ang mipabuto og GP nga pabuto?

Sa ngalan nga ang Goodbye Philippines (GP) nga pabuto usa sa matang sa firecrackers nga gidili sa balaod tungod kay may posibilidad nga makakutlo kini'g kinabuhi, diin nahitabo gayud ang maong pahimangno, igo nang makahatag og tukmang tubag sa itaas ulohang pangutana.

Sa Talisay City, dihay lalaking nagpabuto og Goodbye Philippines agi'g pagsugat sa Bag-ong Tuig 2025. Dili tanan nga iyang gipangdagkotan mibuto. Adunay mipalyar, diin gikatahong iya lang gibiyaan.

Nakita sa mga bata ang maong biyang GP. Busa, gipangpunit-gipupho ug gidala sa ilang lugar.

Pag-abot didto, ilang gitipon paghuho ang mga pulbora, gitabonan og mga buak-biyang tiles ug bato, diin pagkahuman, usa sa mga bata mialsag dakong bato ug gibundak sa maong laundok. Nga maoy nakapalanog sa daw sama kakusog-kasipa sa dinamitang mibuto nga nakapauyog sa palibot.

Ug sama sa nangaigong isda, nangabutalid ang mga batang natamaan sa mga nangabuak-nanglupad-mahait tiles. Resulta? Usa, namatay samtang ang uban nangaangol. Hinuon, inubanan sa usa ka opisyal sa barangay, boluntariyong misurender sa kapolisan ang tag-iyang nagpabuto sa GP aron paglimpiyo sa iyang pangalan. Apan makalimpyo ba siya sa iyang tulubagon?

Si Lt. Col. Epraim Paguyod, hepe sa Talisay City Police Station, mipadayag nga mag-atubang siya'g reckless imprudence resulting in homicide and multiple serious injury nga kaso ug usab mapahamtangan og dugang kaso tungod kay iyang nasupak ang Executive Order 28 ug Republic Act 7183: Regulation of the use and sale of the pyrotechnics and firecrackers.

Dili kay siya ray dapat makasohan. Hasta ang namaligya ug ang tighimo (producer) sa maong pabuto kinahanglan masubay aron mapakanaogan sab og tukmang silot.

Sanglit kon kapolisan magmalampuson ug may ikabansiwag sampol sa mga nadakpan ngadto sa publiko, niini lang paagiha nga mohinay ang paggama ning maong produktong ilegal ug posible pang mahunong sa hingpit.

Dakong leksiyon kini niadtong atong mga kaigsuonang molighot gyod sa pagpalit og mga ilegal nga kalingawan, kinsa kon masakpan, mapaylag kaso ug mapilde, bilanggoan maoy puy-an.

Intawon, maluoy ka sa imo mismong kinabuhi ug usab sa maangin nga kinabuhi sa imong isig ka tawo. Strictly follow the law. Buwahan, always happy atong pagsaulog-sugat sa atong Pasko ug Bag-ong Tuig sa mosunod pang katuigan.