Duha patay, tulo angol sa Christmas tree

CEBU, Philippines — Duha patay samtang tulo ang naangol samtang nanangtang na unta sa ilang Christmas lights nga naa sa Christmas Tree sa Barangay Poblacion, Lungsod sa Mabinay, Probinsya sa Negros Oriental, Lunes sa hapon, Enero 6, 2025.

Ang mga namatay mao sila si Elnie Kadusale Endencio, 41, ug Konsehal sa Barangay Arebasore ug si Jonel Navarro Tenebroso, 31, manlift operator ug sakop sa Local Disaster Risk Reduction and Management Office, taga Sitio Mabaja, Barangay Mayapose, pulos sakop sa Lungsod sa Mabinay, Negros Oriental.

Samtang ang mga naangol mao sila si Jay-Ar Baldomar Norbe, 33, Konsehal sab sa Barangay Arebasore; Realyn Cabilos Billares, 19 anyos, SK Chairwoman sa Barangay Banban ug si Kimjun Balibad Padasay, 30 anyos, Barangay Secretary sa Barangay Arebasore.

Nagkanayon ang tigpamaba sa Negros Oriental Police Provincial Office(NOPPO) Police Lieutenant Stephen Polinar ang mga biktima nagbungkag sa ilang Christmas Tree entry ug gitangtang nila ang Christmas lights gamit ang man lift truck.

Apan aksidente matud nasahid ang boom sa man lift truck sa livewire sa poste sa kuryente hinungdan nga nangakuryentihan ang mga biktima.

Ang maong Christmas Tree maoy entry sa Barangay Arebasore atol sa bag-o lang nahuman nga Lingganay Festival ug usa sa highlights mao ang Christmas Tree making contest sa matag barangay sa Munisipalidad sa Mabinay.

Ang Christmas Tree ilaha na untang hipuson aron dad-on balik sa ilang barangay. Ang tulo ka biktima naa na sa maayong kahimtang human gidala sa Mabinay Medicare Hospital samtang ang duha nga nakabsan gyud sa kinabuhi.

"After the festival kaning tawo they were tasked to remove katong ilahang Christmas decoration para ibalik sa ilahang Barangay pero adto nga time kay while removing kaning wired Christmas lights naigo nila ang main line sa kuryente mao to nahitabo nga nakuryentihan sila and due to the fact nga nag-ulan pud sa Mabinay so ang impact sa kuryente is kusog-kusog pud kaayo", sigon ni Police Lt. Polinar. IBM BANAT NEWS