Marcos loyalists positibong Sara ma-impeach

Marcos loyalists, supporters ug trolls, taliwala niining umaabot dakong ‘January 13, 2024 Peaceful Rally’ sa Manila nga gipangulohan sa mga lider sa simbahang Iglesia ni Cristo (INC) ug abli alang sa tanang katawhan nga gustong moapil, kinsa sama ni Presidente Bongbong Marcos Jr. (PBBM) mipadayag og dakong pagsupak nga i-impeach si Bise Presidente Sara ‘Inday Z. Duterte, nagpabiling siyento por siyento ilang pagtuo nga ma-impeach gayod si Inday.

Sa bag-o pa lang paglingkod ni Inday isip atong bise presidente hangtod ning pagsulat, nakita na mismo sa kaugalingong mga mata sa agila kining daotang tumong sa administrasiyong Marcos, kinsa mora’g til-asan kanunay sa presensiya niining nag-inusarang lider nga hugtanayng nakiggubat batok sa mga kahiwiang buhat sa admnistrasiyong Marcos.

Dakong sugsog si Inday sa ilang mga mata ug higanteng troso nga nakababag sa ilang dalan. Busa, gusto sila nga mahanaw kini sa ilang panan-aw, bahala nag mogasto silag binilyong budget nga ilang nakawkaw gikan sa nagkagidlay na intawon kaayong panudlanan sa atong nasud.

Sa usa ka press conference, nagdilaab sa kapungot ang dughan ni Inday nga mipadayag. Matud niya, bisag ma-impeach na siya, bisa’g atua na unya siya sa Davao City o bisan asang dapita, dili gyod mohunong ang mga Marcos-Araneta-Romualdez forces sa pagpunay’g gukod-lubok-bugbog niya hangtod dili usa sa Marcos-Araneta-Romualdez maoy ma-Presidente sa tuig 2028.

Ingon niini sila kakuyaw-kalala. Walay kalainan sa piranhang gutom, nga hasta bukog usapon taman sa pagkahurot. Okay, ma-impeach g’yud si Inday. Be it! Ug angay ba kining ikalipay sa tanang Marcos loyalists-supporters-trolls ug mga pro-bad governance sa administrasiyong Marcos?

Tingale, wala ni makita sa nahatagag pabor sa mga Marcos. Pero sa kinabag-ang Pinoy, kinsa maoy biktima sa gitabonan ninyong bakak, dili kini malilong.

Gisayonsayon ra man gani nilag surikbot ang P90B PhilHealth fund ug ubang binilyon natong kuwarta sa mga dagkong ahensiya nga anaa pay Inday Sara ug mga Duterte nga mibabag? Unsa kaha, kon wala na sila?

Mga kaigsuonan kong Pinoy, kinsa wala na makakitag kahayag human giulipon sa kangitngit, intawon hunahuna kuno kinig kapito ug kapitoan ka pito ka pilopilo, samtang dili pa kaayo ulahi ang tanan.

Kinsa man diay inyong gimahal-gihigugma-gisunod: Ang Ginoo, o ang yawa?