EDITORYAL - Naghinam-hinam sa Pista Senyor ug Sinulog

Daghan ang naghinam-hinam sa umaabot nga Pista Senyor ug sa Sinulog karong tuiga kay gibalik na sa naandan nga venue ang parada ug ang kompetisyon gikan sa kaniadto South Road Properties sud sa duha ka tuig.

Gani daghan kaayo ang matud pa contingents nga moapil karon, apil niini ang napulo ka out of town contingents, naa pa gyuy gikan sa probinsya sa Sugbu ug usa ka bag-ong grupo gikan sa Luzon nga sa labing unang higayon mosalmot.

Gawas sa mga mobisita aron mamista ug motan-aw sa parada, dako sab ang kalipay ani sa mga nagnegosyo apil ang mga ginagmay nga manindahay sa aseras tungod kay modako ilang halin.

Sa nakalabay nga duha ka tuig, nagmingaw ang mga tindahan sa sentro sa siyudad ilabi na sa dalan Colon, kay didto man gihimo ang Sinulog Grand Parade sa SRP.

Daghan ang nakasaway nganong didto kini gihimo nga wala man kaayo kini mga tawo ug lisud makapasilong gumikan kay menus rang mga edipisyo gawas lang sa dakong mall ug sa usa ka dakong hotel.

Apan kinahanglan nga paspasan sa siyudad ang pagpahawan aning mga biya sa gipangtukod nga estraktura sama sa CBRT, sa mga kanal, mga dalan ug uban pang sambol sa agianan.

Kay peligro kini dili lang sa contingents kondili sa mga manan-aw sab. Siguro nga walay mga trabaho nga himuon sa maong mga proyekto atol sa Sinulog, apan kinahanglang hinloan kini og maayo ug siguraduhong walay mga tawong maaksidente tungod ani.

Husto si Mayor Raymund Alvin Garcia sa pamahayag niyang dili tungod sa imbitasyon sa siyudad mao nga daghan ang nangapil karon nga contingents.

Nagtuo siya nga ang pagbalik nganha sa karaang venue sa sentro sa siyudad ug sa Cebu City Sports Complex mao ang nakaengganyo sa mga buot moapil karon.

Kinahanglan lang gyud nga hapsayon gikan sa mga basura ug debris sa mga proyekto ang kadalanan.