Marcos dili pahoy
Usa sa mga depensa sa Malakanyang nga klarong natay-og pag-ayo sa eskandalo sa 2025 budget: Walay gahom si Presidente Ferdinand Marcos Jr. ubos sa 1987 Constitution sa pagbalik sa gilaslas nga budget sa mga ahensiya, apil nang subsidy sa Philippine Health Insurance Corporation (PhilHealth).
Usa sa mga pagsaway sa mga grupo nga niawhag ni Marcos Jr. sa wala unta pagpirma sa 2025 budget, nga ilang gihulagway nga labing kurakot sa kasaysayan: Sayop ang mga tambag ug kasayuran nga nadawat sa presidente parte sa tinuod nga kahimtang sa panalapi sa PhilHealth.
* * *
Tinuod nga walay gahom ang presidente sa pagbalhin sa iyang gi-veto nga pundo sa Department of Public Works and Highways (DPWH) aron ipuno sa budget sa PhilHealth, Department of Education (DepEd) ug ubang mga ahensiya.
Pero wala ni magpasabot nga wala siyay labot sa paghimong itlog sa subsidy sa PhilHealth ug pagpaburot sa P288 bilyones nga pork barrel projects sa mga kongresista ug mga senador sa DPWH. Tanang maniobra sa budget nga gipasiugdahan nilang House Speaker Martin Romualdez, Senate President Chiz Escudero ug kaubanan dunay bendisyon gikan sa presidente.
* * *
Sukwahi sa ilang pasalig nga makalahutay ang PhilHealth bisan walay subsidy, nahibawo ang presidente ug Finance Secretary Ralph Recto nga alkanse ang PhilHealth. Kay gipahibawo na sila sa Commission on Audit (COA) nga mas dako ang utang kay sa kita sa PhilHealth.
Nakahibawo ang kadagkoan sa PhilHealth nga bakak ang saad pagpalapad sa mga benepisyo. Napublikar sa ilang website ang financial statement nga nagpakita nga kon kuhaan ang ilang pundo sa P1.2 trilyones nilang Insurance Contract Liabilities, kuwang sila og P629 bilyones.
* * *
Sa dili pa malingla sa propaganda nga si Marcos Jr. gigawongan lang sa mga opisyal nga naglibot niya, angay tang pahinumdoman nga ang nagtungkawo karon sa Malakanyang:
• Anak sa anhing diktador ug kanhi unang ginang nga gipasanginlan nga maoy labing kawatan sa tibuok kasaysayan;
• Konbiktado og tax evasion sa siya pay gobernador sa Ilocos Norte; ug
• Administrador sa gidudahang ilegal nga katigayonan sa Pamilyang Marcos nga nagdumili pagbayad sa ilang utang sa estate tax nga, segun sa demand letter sa Bureau of Internal Revenue (BIR) niadtong 2021, niabot na og P203.8 bilyones.
* * *
- Latest
