Good vibes sa 2025

Nitikang na gyud kita sa tuig 2025 uban sa panghinaut nga mabungahon ug puno sa grasya ang atong matagamtaman sa tibuok tuig gyud, goob vibes lang sa 2025. Talikdan man nato ang mga dagkong katalagman sa nakalabay'ng tuig apan dili nato hikalimtan ang mga leksyon nga atong nakat-onan.

Dili lalim ang mga pasuway nga nahiaguman sa tuig 2024 pero magpasalamat lang kita nga nalatas nato ug nakalampos kita sa paglabang niining laing tuig sa atong pagpakabuhi inubanan sa padayon nga pagpaningkamot nga matinuod ang atong gipangindahay niining tuiga.

Makab-ot nato kini pinaagi sa pagpaningkamot inubanan sa kakugi ug hugot nga pag-ampo sa Ginoo kay mao ra man gyud kini ang yawe sa atong kalamposan. Basin ang uban nagdahum na nga maswertehan tungod kay nakapalihi og mga lingin nga prutas kagabii, dili gihapon kana mosaler kong padayon nga magtinapolan ang tawo.

Adunay dagkong mga panghitabo ang atong paaboton niining tuiga, usa niini ang umaabot nga eleksiyon sa Mayo diin mopili na usab kita og mga sulogoon sa katawhan. Makapili ba gyud kita og mga tarong nga public servant? Ambot lang kay murag wala ra bay mapili nila.

Kong dili mausab ang mindset sa katawhan nga palabihon ang kwarta magpabilin gihapon ang systema nato nga walay nakat-onan kay gipalabi man ang kahakog sa mga sinsilyo nga ihaylo sa mga tampalasan nga politiko.

Karon pa lang huna hunaon nato sa makadaghan ayha kita mohukom kinsa ang atong dawaton sa pwesto nga makahatag kanato og serbisyo nga tinuod kanang makaingon ta nga tinuod gyud nga good vibes ang atong kahimtang sa umaabot. Basin kutob ra ta sa bagotbot nga na bad shot sa atong gipili. Bitaw biyaan sa nato na ang isyu sa politika diri ta mga makapagaan sa buot nga kita ra mismo ang magmugna alang sa atong kaugalingon ug sa mga tawo nga anaa sa atong palibot.

Mohimo lang kita og maayo pinasubay sa katarong ug hustisya nga dili kita nakaligis sa katungod sa atong isig ka tawo, best vibes na kaayo na. Happy New Year mga higala!