Kanus-a pa man molihok?
Mangahas ko og Binisaya sa sinuwat ni Raniel Dan Avila Samplano batok sa pagmaniobra sa 2025 budget nga pirmahan ni Presidente Ferdinand Marcos Jr. karong adlawa:
“Ang hawanan sa House ug Senado nangalisbo sa pagbudhi. Samtang naghago ug nagsakripisyo para sa nasud, ang nagpatuong mga lider nangawat dili lang sa atong katigayonan kon dili sa atong kaligdong. Dihang gilaslas sa Kongreso ang binilyon ka pesos gikan sa edukasyon, ilang giluba ang ugma sa mga bata. Ang 1987 Constitution nagsugo nga ang edukasyon maoy kinadak-an og budget. Pero ilang gilapas ang balaod.
* * *
“Paghikaw sa pundo sa PhilHealth sa 2025 maoy pagdeklarar sa Kongreso og gubat batok sa mga pobre. Pila ka ginikanan ang maglubong sa ilang mga anak kay dili makabayad og doktor? Pila ka mga pangulo sa pamilya ang mainutil sa sakit kay gipasagdan sa gobyerno? Ang PhilHealth dili reserba nga pundo nga mahimo ra nilang surikbuton. Kon dili dangpanan sa minilyon ka Pilipino kon mangasakit. Gilapas sab nilang Universal Health Care Act nagsugo nga ang sin taxes mosuporta sa PhilHealth.
Ang "Ayuda sa Kapos ang Kita Program" o AKAP maoy pagpalit sa eleksiyon nga gipatuong ayuda. P26 bilyones ang gikawat gikan sa edukasyon ug kahimsog. Isabod ang mumho sa katawhan atol sa eleksiyon samtang minilyon ang lunosan sa gutom. Kada peso nga usikan sa AKAP laing peso nga kawaton gikan sa mga eskuylahan, ospital ug kadalanan. Nagtuo bang dili tang kakita sa ilang maniobra?
* * *
“Pero tingali ang kinadak-ang pagbudhi maong atong kaugalingon. Atong pagpakahilom nipasamot sa ilang kahawod. Nganong gitugotan man nato silang nilungkab sa nasud? Tungod ba sa kahadlok? Ka-walay pagpakabana? Kakapoy? Bisan unsa pay rason, atong pangiyugpos nakapagara nila. Bisan ang Korte Suprema nitalaw sa Kongreso. Asa mang hustisya sa mga dinaugdaog kon ang mga korte magkuray sa kahadlok?
“Pero dunay paglaom. Kita, ang katawhan, maoy tinuod nga gahom sa nasud. Mahimong tapuson kining pagbudhi. Mabawi ang unsay ato–gobyerno nga moserbisyo, dili mangawat. Kon maghiusa ug molihok, mabawi nato ang nasud gikan sa mga kawatan ug mabudhion. Atong kasuko himuong pabilo sa rebolusyon sa pagpaningil. Ang pangutana dili kon makasukol ba. Kon dili makasukol ba sa dili pa uwahi ang tanan?”
* * *
- Latest
