Pagluba sa kinaiyahan
Duha ka makapaguol ug makapasuko nga kasayuran nga nagmatuod sa kalisod sa pakigbisog sa pagpanalipod sa kalikopan:
Una, giputol ang makasaysayanon nga kapin sa 100 ka tuig na nga mga punoan sa kahoy sa Carcar City nga gibasol sa kalangay sa pagpalapad sa nasudnon nga highway sa habagatan nga bahin sa Sugbo; ug
Ikaduha, gipalayas gikan sa isla sa Camotes sa amihanan nga bahin sa Sugbo ang pari nga nangahas sa pagpangulo sa protesta batok sa pagpamutol sa mga punoan sa kahoy nga maigo sa proyekto pagpalapad sa kadalanan.
* * *
Makapahugno ang pagputol sa mga punoan sa kahoy nga nagpandong sa kadalanan sa Carcar sa niaging kapin sa usa ka siglo, apil na ang atong katiguwangan nga namakwet gikan sa kasalbahis sa Imperial Army sa Japan, sa ikaduhang gubat sa kalibotan, kay:
Napanalipdan sila sa nagpakabana nga mga Sugbuanon gikan sa nahauna nga mga pagsuway pipila ka tuig na ang nilabay; ug
Nahinayon sa pagputol human sa pasalig sa Department of Public Works and Highways (DPWH) ug mga politiko nga nakakita sila og alternatibo nga ruta para sa nasudnon nga highway.
* * *
Makapasubo ang inhustisya nga nahiagoman sa pari sa Camotes nga igo lang nangulo sa iyang mga parokyano sa paghatag og unod sa pagdasig sa simbahan sa katilingbanong paglihok pinaagi sa pagbarug sa ilang mga katungod.
Lisod sabton nga imbes pasidunggan sa iyang kongregasyon ang talagsaon niyang liderato, niduko man hinuon sila sa pagdumot sa mga politiko nga dili makapasaylo sa mga nangahas sa pagkuwestiyon sa ilang mga plano.
* * *
Angay nga ihan-ok ang tanan natong kasuko ngadto sa mga opisyal sa gobyerno nga bisan sa nagbuntaog nga mga ebidensiya sa higante nga kadaot sa global warming padayon nga nagpaugat sa pagpuril sa atong kakahoyan, pag-upaw ug pagpatag sa atong kabukiran, pagkubkob sa atong kasapaan ug pagtabon sa atong kadagatan.
Dili sab mapasaylo ang mga politiko nga imbes mao ang magdala sa buot mao na man hinuon ang nangulo sa mga pataka basta nga dili lang mahilabtan ang dagko nilang komisyon ug ang nagbansiwag nila nga mga ngalan ug mga dagway sa ampaw nga mga proyekto.
* * *
- Latest
