Mahinungdanon ang pamilya

Pangilin sa Balaang Banay nila ni Jesus Maria ug Jose

Mga Pagbasa: 1 Sam. 1;20-28/Sal. 84/Col. 3;12-21/Lk. 2;41-52

Matud pa kini ang basic unit sa katilingban. Kun unsa ang kahimtang sa matag pamilya siguro gyud nga kun ungkag ang matag pamilya ungkag sab ang katilingban. Hagit kini sa matag Kristohanon nga ang matag pamilya pagahimoon usab nga domestic churches sinunod ang mga birtud ug mga hiyas nga nahuptan sa Balaang Pamilya.

Daghanan sa mga pamilya karon ang nahimong nagun-ob ug wala maatiman gumikan sa mga hingtungdan mismo. Nagminyo nga wala makapangandam ug mas gipalabi pa ang dili mahinungdanon kaysa bisan unsang mahinungdnaon diha sa pagpangandam sa kaugalingon kun hamtong na ba gyud kun mosulod na sa maong matang sa bokasyon kun pagkinabuhi.

Ang gikinahanglan sa matag pamilya karon mao ang pag-atiman nga espirituhanon pinaagi sa mga pag-ampo ingon man sa mga sakramento.

Ang lawasnon pinaagi sa mga programa nga makatabang alang sa kahimsog ug labaw sa tanan ang pag edukar sa matag pamilya nga ang pamilya ingon nga institusyon tunghaan sa kinabuhi ug dili sa kamatyon.

Unta ang matag banay mapanalipdan gikan sa bisan unsang paghasmag nga yawan-on ug makalingkawas siya sa bisan unsang gambalay nga sa hinay hinay nga paagi ang nitay-og sa sagradong institusyon nga tinukod ni Kristo  ingon nga unang seminaryo alang sa iyang pulong ug pagtulon-an.