EDITORYAL - Ayaw usiki ang kahigayonan

Ayaw usiki ang kahigayonan, dili sayon makasulod sa pagka polis. Mao kini ang pasidaan ug pahinumdom ni Police Brigadier General Constancio Chinayog Jr., Acting Director for Personnel and Records Management nga nagnagsilbing inducting officer sa 600 ka  mga bag-ong polis.

Ang 488 ka mga lalake ug 112 ka mga babayeng bag-ong patrolman ug patrolwoman nanumpa kagahapon diha sa sa buntag sa Camp Jesse M. Robredo, Regional Training Center-7 sa Barangay Jugan, Lungsod sa Consolacion, isip mga bag-ong polis.

Mopaubos sila og unom ka buwang training diha sa maong tunghaan ayha pa sila mopaubos sa field test program, una pa makompleto nga sila pagatawgong usa ka polis.

Sakripisyo sa ilang parte kay sila may mag-training, sakripisyo sab sa ilang kabanay nga dili makakita kanila sugod karong adlawa hangtud sila motapos sa ilang unom ba kuwang training diha sa Consolacion.

Si Chinayog mipasidaan nga kining ilang trabaho “serbisyo publiko” ug dili unta kini usikan nga kahigayonan sa mga bag-ong polis , kay pwerte baya daghana ang nangaplay unya sila maoy nakapasar sa kwalipikasyon.

Sa sinugdanan, kini silang tanan siguro nga nag-ampo na makapasar ug madawat sa PNP. Unta, ilaha kini pagadad-on hangtud sa hangtud sa ilang pagretiro.

Kay pagkatinuod, ang usa ka polis gawas nga lisud sudlon, daghan kaayo og mga hagit sa ilang panerbisyo.

Naa tanan ang nag-awas nga garbo nga sila usa n aka polis ug magtak-in na og armas ug labaw sa tanan matawag na sila nga “otoridad.”

Ang tan-aw kanila sa mga tawo mga propesyonal gyud ug makahibalo sa pamalaod ug sa ilang responsibilidad isip tigpanalipud ug alagad sa katawhan.

Apan tungod ani, usahay dunay ubang mga polis nga naghinobra kataas ilang pagtan-aw sa ilang kahibalo o sa ilang kaugalingon.

Mao nga anhi dapita sila masayop ug makasala sa publiko nga ilaha untang proteksyonan ug serbisyohan.

Dunay mga bagitong polis nga mo-insister nga silay sakto unya usahay wala sila masayod nga ang ilang gitan-aw nga ordinaryong motorista o sibilyan nga ilang makaatubang mas nakahibalo pa diay kanila sa balaod, sa mga lagda ug sa tawhanong katungod niini.

Mao nga itanom gyud unta sa hunahuna aning mga bag-o ug bisan mga karaang mga polis unsa kalisod pagsulod sa PNP.