Hustisya nang pakilimos
Kon tinuod ang pangangkon sa Department of Social Welfare and Development (DSWD) nga ang ilang social workers, ug dili ang mga politiko, maoy nagbuot kinsay hatagan sa Ayuda sa Kapos Ang Kita Program (AKAP), nganong mga kongresista ug lokal nga mga opisyal man ang nagdominar sa kalihokan sa mga barangay?
Gani, mga kongresista ug mga politiko nga suod nilang House Speaker Martin Romualdez ug Presidente Ferdinand Marcos Jr. nag-Facebook Live ug nagwara-wara sa social media. Nga sila ang nangulo, nangimbitar sa beneficiaries, nag-organisar ug nangunay sa pag-apud-apod sa ayuda.
* * *
Pag-agi nako sa Canduman, Mandaue City sa niaging semana, nakasunod ko og mga molupyo nga malipayong nanglakaw gikan sa giingong venue sa pagpanghatag nga nagsul-ob og t-shirts dunay markang “AKAP” ug “MR” sa atubangan. Sa luyo nihuot ang dagway ni Romualdez.
DSWD ba sab ang nagpapatik sa AKAP shirts? Ila ba sang social workers ang nagbuot nga butangan sa nawong ni Romualdez sa luyo? Nagpaabot ba gyod si DSWD Secretary Rex Gatchalian nga motuo ang mga magbubuhis nga makabalibad siyang Romualdez ug nga makabadlong ang social workers sa mga politiko?
* * *
Kahinumdom mo dihang unang nitumaw ang kontrobersiya sa AKAP sa pagduso ni Romualdez sa charter change sayo karong tuiga? Niingon ang DSWD nga wala kahibawo unsaon pagpatuman ang AKAP. Nahibulong na lang sila dihang napun-an og P26.7 bilyones para sa AKAP ang ilang budget karong tuiga.
Niadtong Agosto, nagdalidali si Gatchalian paghimo og mga lagda sa AKAP aron pag-angkon sa programa. Pero ang iyang gilista nga mga panginahanglan wala tumana sa mga politiko nga maoy nagbuot kinsay hatagan.
* * *
Nipasabot ang mga kongresista nga nitambong sila sa pag-apud-apod sa AKAP aron sa pagseguro nga natarung sa pagpatuman ang programa. Niingon sab si Romualdez nga ang AKAP dili ayuda kon dili hustisya.
DSWD gyod tingali ang nagbuot kay nauyonan man nga sa P26 bilyones nga AKAP sa 2025, P21 bilyones ang bahin sa mga kongresista ug P5 bilyones ang ila sa mga senador. Ug hustisya diay ang tawag sa paglaslas sa budget sa mga ahensiya aron mas daghang katawhan kinahanglan nang moluhod nilang Romualdez ug kaubanan una mahatagan sa batakang mga serbisyo.
* * *
- Latest
