EDITORYAL — Leksiyon gikan ni Veloso

Nakabalik na dinhi sa Pilipinas kagahapon, Miyerkules sa buntag, si Mary Jane Veloso, ang OFW nga napriso didto sa Indonesia tungod sa drug trafficking.

Dul-an 15 ka tuig siyang nabilanggo didto tungod sa kapin duha ka kilong heroin nga nakita sa iyang bagahe.

Pabilin niyang gibarugan nga dili iyaha ang bagahe apan gipamalihog ra kini pagpadala kaniya sa mga ni rekrut niya og trabaho didto.

Nahukman siya og silot kamatayon. Niadtong 2015 gikatakda na unta siyang bitayon, apan tungod sa personal nga paghangyo ni kanhi presidente Benigno "PNoy" Aquino III, nauktaba kini.

Sa paglingkod ni Presidente Ferdinand Marcos Jr. gipadayun ang negosasyon ug positibo ang bunga niini, nitugot na ang Indonesia nga ibalhin og prisohan dinhi si Veloso bisan og way death penalty dinhi.

Gani gihatag na sa Indonesia ang tanan sa Pilipinas kun unsay buhaton kang Veloso. Lanog ang panawagan nga hatagan siya og clemency o presidential pardon aron makabalik na siya sa iyang pamilya ilabi na sa iyang mga anak.

Ang nahitabo kang Veloso posibleng mausab ngadto sa ubang mga Pilipino nga mobiyahe sa abroad.

Ilabi na sa mga nangindahay nga makatrabaho didto.

Daghang mga illegal recruiters nga bisan unsang orasa mahimong makabiktima kun dili magmatngon sa aplayan nga mga ahensiya.

Tan-awon gyud kun lehitimo ug giila sa Overseas Workers Welfare Association (OWWA) ang mga recruitment agencies nga napiliang aplayan.

Dili magpataka og dawat og mga butang o bagahe nga ipamalihug og dala gikan sa uban ilabi na sa mga tawong wa ka personal nga nakaila.

Karong nakabalik na sa Pilipinas si Veloso, magsilbi kining labing unang Pasko nuya kauban iyang pamilya sud sa nakalabay nga 14 ka tuig.