EDITORYAL — Christmas bonus

Matag kapaskohan makatandi gyud og maayo ang mga empleyado sa ilang mga dawatonon nga Christmas bonus wala pay labot na sa ilang 13th month nga gimando gyud sa balaod nga ipahatag sa mga kompanya ngadto sa ilang mga trabahante.

Apan sa tanan, ang pinakahayahay mao ang mga nagtrabaho sa gobiyerno tungod sa kadagko sa ilang madawat nga bonus ug kanang ilang gitawag nga Service Recognition Incentives nga pwerteng dagkoa.

Ang mga kawani sa gobiyerno malipayon kaayo sa ilang nadawat kay dagko kini ug makasarang gyud sa ilang pangpasko.

Sa pikas bahin, ang mga naa sa pribadong sektor duna say madawat nga 13th month ug bonus. Apan mag-agad ra gihapon sa kompanya kun mohatag ba sila og bonus o kun pilay ihatag.

Ang mga nagtrabaho sa pribadong sektor igo nalang sab manghupaw sa pagtandi sa ilang bonus ngadto sa mga government employees. Apan kutob ra diha, kay lisud man gyud tupngan ang mga naa sa gobiyerno.

Sa pribdong sektor, kadto ra gyung mga naa sa duol sa luwag maoy makalabaw og gamay itandi sa ilang mga yanong empleyado.

Sa pagkatinuod, bugtong ang gobiyerno lamang ang kompanyang dili malugi o maalkanse, dili basta mabangkaruta ug labaw sa tanan dili mopasagad sa ilang mga kawani.

Hinuon nagdepende kana sa ranggo ug posisyon, apan dagko gyud gihapon ang madawat sa mga nagtrabaho sa gobiyerno.

Apan ngano man gyud nga duna man gihapoy mga empleyado sa gobiyerno nga naa nay mga nakasulod og trabaho sa gobiyerno nga magbinuang pa man gihapon sa ilang trabaho?

Nganong usikan man nila ang kahigayonan nga unta dagko man ang sweldo ug mas maayo pa gyud og benepisyo itandi sa pribadong kompanya.

Busa kamo dihang  mga naa sa gobiyerno karon, ampingi kanang inyong trabaho ug sunda ang mandato nga gihatag kaninyo. Kay kining mga naa sa pribadong sektor nanarbaho dako og gihatag nga amot gikan sa ilang sweldo ug buhis para mo makasweldo.

Panerbisyo mo og tarong ug ayaw mo pangawat sa kaban sa katawhan.