Eskandalo sa budget
Dihang napalagpot nila si kanhi Senate President Migz Zubiri pinaagi sa kudeta niadtong Mayo, gipangayo ni Senador Grace Poe ang labing gamhanan nga finance committee ug wala balibari sa suod niyang higala nga si Senate President Chiz Escudero.
Wala mag-usik og panahon si Poe pagpasalig og mas makiangayong pagtuki sa budget sa 2025 sa nagkalainlaing mga ahensiya. Pagmatuod nga wala mobilib sa budget deliberations nga gidumala sa iyang gipulihan nga si kanhi Senador ug karon Education Secretary Sonny Angara, nisaad si Poe nga ablihan sa publiko ang bicameral conference committee.
* * *
Sa pagtuki sa budget sa labing kontrobersiyal nga mga ahensiya, gipakita ni Poe nga dili siya mabentahaan ni Angara sa pa-gorya-gorya:
Sa niaging tuig, si Angara nilampos pagtangtang sa confidential funds sa Office of the Vice President (OVP) ug Department of Education (DepEd) samtang nagsige og ulug-ulog ni Bise Presidente Sara Duterte; samtang
Karong tuiga, samang ulug-ulog ang gihimo ni Poe sa paghipos sa mga alyado ni Duterte sa Senado sa iyang paglaslas sa gipangayo nga P2.037 bilyones nga budget sa OVP ngadto na lang sa P733 milyones.
* * *
Sa tigom sa mga kongresista ug mga senador paghapsay sa managlahing mga probisyon sa P6.352 trilyones nga 2025 budget, ni-garantiya si Poe pagbaraw sa eskandalo sa 2024 budget–ang pagsukip sa probisyon sa General Appropriations Bill nga nagtugot sa Malakanyang pagkuha sa excess funds sa Philippine Health Insurance Corporation (PhilHealth) ug ubang government corporations.
Niinsistir siyang dili na sekreto ang bicam deliberations. Kay iya nang pasudlon ang mga sakop sa media.
* * *
Nahuman ang tigom sa bicam nga walay reporter nga gipalili. Ang aprubadong 2025 budget nibisto nga si Poe pareha rang Angara:
Human papasa ang P26 bilyones nga Ayuda sa Kapos ang Kita Program (AKAP), nisugot si Poe nga P21 bilyones ang bahinon sa 316 ka kongresista ug P5 bilyones para sa 23 ka senador;
Itlog (imbes P74 bilyones) ang subsidy sa PhilHealth, P42 bilyones ang laslas sa edukasyon ug P26 bilyones ang laslas sa Department of Health (DOH); kay
Gipaburot og P21 bilyones ang budget sa House ug Senado ug gipasulbong sa P1.1 trilyones ang budget sa Department of Public Works and Highways (DPWH).
* * *
- Latest
