Panaw sa Adbiyento: Mas labaw gyud ang kabubut-on sa Dios

Sukaranang Teksto: Mt. 1;18-25

Kaniadto usa ka dakong salaod nga mabuntis nga dili pa asawa. Ang silot niini kamatayon pinaagi sa pagbato. Ang unang mobato sa babaye mao gyud mismo ang iyang amahan o igsuong lalaki atubangan mismo sa ilang panimalay. Dili lang kini isyu sa pagmabdos hinunoa, isyu pud ni sa dungog. Sa kapanahonan nilang Jose ug Maria gikalisangan gyud ang kaulawan. Maningkamot gyud ang matag tawo mapanalipdan lamang ang ilang dungog.

Ning maong kahimtang niabot og tumang kalibog si Jose kaliwat ni David. Tawo siya nga matarong nga sa ato pa, masinugtanon sa balaod. Mahimong iyang ibutyag ang kahimtang ni Maria apan sa laing bahin gibati niya ang tumang kalooy mao nga nakahukom na lang siya pagkigbulag kaniya sa hilom. Kini ang gilaraw ni Jose apan lahi ang laraw sa Dios.

Pinaagi sa damgo gipahimangnoan siya sa anghel nga angayang pangasaw-on si Maria sanglit ang iyang gisabak Lalang man sa Espiritu Santo. Adunay mas halawom nga tumong kun nganong nagmabdos si Maria. Ug human siya masayud sa tumong si Jose ang tawong matarong nagmsinugtanon pinaagi sa pagpangasawa kang Maria. Nitahan siya sa iyang kaugalingong kabubut-on sanglit aduna man siyay dakong pagtamod sa  Diosnong Pagbuot.

Sa atong panaw sa Adbiyento ngadto sa Pasko sa Pagkatawo sa atong Ginoo kita gipahinumdoman ning mosunod:

1. Adunay mga higayon nga ang atong expectation dili mosibo kun unsay gitanyag sa kahigayonan.

2. Kinahanglang maantigo kitang modawat niini matud pang Bruce Lee: “Be water my friend!”

Unsay gipasabot niini?

a. Be Formless, shapeless. Nga sa ato pa gikinahanglan nga kita mamahimong flexible. Gikinahanglan nato ang adaptability.

b.  Mahinungdanon ang focus sa karon. Stay Present and Aware. Ayaw kalansang sa imong kagahapon ni ayaw kalisang sa umaabot.

c.  Disiplina sa Kaugalingon. Gikinahanglan kaayo kini diha sa pagkab-ot nato sa atong mga plano sa kinabuhi.

d. Ayaw tugoti ang imong Ego nga maoy modumala kanimo. Diha lamang sa pag-angkon nga kita padayong magkat-on kita makalampos gayud.

e. Turn your Weaknesses into Strengths. Atong atubangon ang atong kahuyangan ug ato kining himoong kahimanan sa pagpalig-on sa atong kaugalingon.

f. Seek Balance. Ang bisan unsang sobra makadaut ni ang bisan unsang kuwang makadaut man usab.

g. Trust your intuition. Usahay ang atong instincts kasaligan kaysa rigid logic. Mahinungdanon kaayo ang awareness ug mindfulness sa matag higayon.

h. Constantly Evolve. Matag adlaw kahigayonan sa pagkat-on. Ayaw hunong sa pagkat-on.

2. God’s Will is the Best. Mao ni ingon ni Fr. Joseph Aveni. Si San Jose ang nakakita usab niini mao nga wala siya malisang bisan pa tingali kun pagatawgon siyang Salvador del Mundo.

God’s will is the Best tungod:

a. Siya atong Amahan ug nasayud siya sa atong panginahanglan.

b.  Iyang ihatag ang atong gikinahanglan dili ang atong kapritso.

c.  Ihatag niya kini sa hustong panahon nga iyang gimbut-an.

Note: Ayaw kahadlok pagtuman sa kabubut-on sa Dios, Kahadloki ang saad sa tawo. Daghang mga tawo daw dugos ang gipamulong apan puno sa venom ang ilang tanlag ug kasingkasing.