Domingo sa patay

Gipamusil sa amahan ang iyang asawa ug mga anak samtang anaa sila sa talad kan-anan alas 8:00 sa buntag niadtong adlaw nga Domingo, Disyembre 15, 2024 sa Dakbayan sa Talisay. Apan ang amahan nga namusil mao hinuon ang namatay dihang giataki siya sa iyang gipangpusil.

Naigo sa pagpamusil mao sila si Danilo Cabungcag Jr., 33-anyos, nga nasamdan sa iyang nawong; Erika Rose Cabungcag, 20-anyos nga nasamdan sa iyang tiyan; ug Justina Amarillo Cabungcag, 60-anyos, nga asawa sa namusil nga si Danilo Cabungcag Sr., 67-anyos.

Si Danilo Cabungcag Sr. namatay human giataki sa iyang sakit sa kasingkasing dihang nailog gikan kaniya sa iyang mga anak ang armas nga iyang gigamit sa pagpamusil kanila. Kabtangan ang gituohan nga hinungdan sa krimin.

Samtang patay usab ang 24 anyos human gidunggab sa iyang kanhi 32 anyos nga live-in partner alas 3:00 sa hapon sa mao gihapon nga adlawng Domingo sa Dakbayan sa Naga.

Ang biktima nga si Rosemarie Pasaporte, pito na ka buwan nga buwag sa suspetsado nga si Mario Gabayan. Ang biktima ug suspetsado gikan pang mitambong sa Christmas party sa 3-anyos nilang anak apan sa pagpamauli nila sa balay kuyog ang ilang anak naglalis ang duha nga miresulta sa pagpanunggab. Ang pagpanunggab gihimo sa suspetsado atubangan mismo sa iyang anak.

Ang 3 anyos nga bata nagpanawag og tabang samtang nagsunod niya nga naglakaw ang iyang inahan nga luya na nga may nagtaup pang kutsilyo sa liog niini.

Ang pagkahingulata ni Mario ngadto kang Rosemarie ang gituohan nga hinungdan sa pagbuwag sa duha.

Sa linghod nga edad sa bata nga nakakita sa krimen nga gihimo sa iyang amahan dako og ikatampo sa personalidad sa bata sa iyang pagdako. Bantayanan ug kinahanglan nga giyahan ang pagdako aron dili siya mapariha sa iyang amahan.