Panaw sa Adbiyento: Ang kahayag nga gipaambit

Sukaranang Teksto: Jn. 5;33-36

Si Juan Magbubunyag ang nakapundok og mga sumusunod ug daghan kanila ang dunay pagtuo nga siya mao gyud ang Mesiyas nga dugay na nilang gipaabot. Apan si Juan Magbubunyag sama man sa buwan nga nakabaton og kahayag gumikan sa adlaw. Ang adlaw maoy tinubdan sa kahayag ug niambit lamang ang buwan niini. Kita usab ang nakatagamtam sa maong kahayag sa matag gabi inga kasinatian.

Sa laing bahin, si Juan Magbubunyag ang nakaambit sa maong kahayag gikan sa tinubdan nga mao si Kristo Jeus. Mao nga sayud si Juan kun asa kutob ang iyang papel diha sa kinabuhi ni Kristo. Dili siya ang mesiyas hinunoa ang mag uuna niini.

Sa atong pagsaulog sa Pasko sa Pagkatawo sa Ginoo usahay nasilaw kita sa mga panggawas nga mga preparasyon. Christmas Party ug uban pa. buot natong busgon ang atong mga mata sa mga maanindot nga mga talan-awon. Buot natong busgon ang atong tiyan ingon man atong patilawon ang atong mga dila sa pagkaong lamian. Apan kining tanan dili man mao ang makapahimo sa Pasko nga makahuloganon ug tulukibon.  Ang tinuod nga pagsaulog anaa sa mga buhat nato nga makapahimuot sa Dios. Naglambibit kini sa kaangayan, pagkamanggihatagon ug sa pagka matinud-anon sa atong tawag nga gisangon sa Dios alang kanato.

Taliwala sa atong kahuyangan mamahimo unta kita sa gihapon nga mga inspirasyon alang kanila nga nawad-an niini. Nkadawat kita sa kahayag gikan sa Dios ug angayan lamang nga ato kining ipaambit ngadto sa uban.