Buotan ug dautan naa sa palibot sa simbahan

Nisugwak ang mga tawo nga nanambong sa pagbukas sa siyam ka adlaw sa Misa De Gallo kaganinang kaadlawon isip kabahin sa atong pagsaulog sa adlaw diin gihimugso ang atong Manunubos nga si Hesus.

Kining mga adlawa ang tingmata og sayo sa mga tawo nga buot motambong ug makakompleto gyud sa siyam ka adlaw.

Usa ra man ang tumong niini nga mao ang paghimaya sa atong Manunubos. Apan dili malikayan nga ang uban adunay kinaugalingon nga katuyoan ug isipon nila nga magsakprisyo og mata panahon sa kaadlawon aron segurado kuno nga pamation sa Ginoo ang ilang gipangaliya. Personal apan dunay sagol nga hinangol ang tumong kong atong pamation kay nagpaabot og bugti sa gihimo niini nga pagtambong sa Misa de Gallo.

Tinuod duna man kitay mga gipangayo o gipangaliya sa Ginoo apan dili haum nga pangayoan nato og bargain kon dili mas mahatagan kita og grasya kon bukas sa atong kabubut-on ang pagtambong sa misa tungod kay atong gihigugma ang Ginoo ug Siya na ang bahala sa tanan.

Busa wagtangaon nato kini nga mindset nga magsakripisyo kita aron matuman ang ang atong gipangayo. Inay isalig nato ang tanan ngadto kaniya inubanan usab sa pagpaningkamot aron seguradong makab-ot kong unsa man ang atong gitinguha nga mahitabo.

Samtang pahimangno usab ilabi na sa mga batan-on nga mokuyog lang sa panon mosimba kauban ang.mga barkada apan inay mangaliyop, ang uyab uyab naman hinoon ang gikalingawan, dili mosulod sa simbahan kay didto ra sa daplin sa ngitngit nga dapit nagpahipi.

Ayaw himoa nga rason ang Misa de Gallo aron makalugar sa pag-date sa uyab. Himoa lang na ninyo sa laing dapit ayaw sa panahon nga atong gihandum ang grasya sa Ginoo.

Laing pahimangno sa mga mosimba nga magmatngon kay dili tanan anaa sa palibot sa simbahan mga buotan kon dili naa usab ang mga dautan nga mamiktima sa mga tawo ilabi na kadtong nagpasundayag sa ilang daghan nga mga alahas.

Dili na pareha ang panahon karon itandi kaniadto nga nitago ang mga dautan kay subli na silang nilihok, hilom pa apan hilabihang bangisa nga angayan pangandaman. Hinuon dunay mga pulis ang nagbantay apan sila ra man usab ang gibantayan sa mga tampalasan, busa amping gyud kitang tanan.

Advance Merry Christmas!