Nag-usab-usab nga panagang
Ang higanteng laslas sa budget ni Bise Presidente Sara Duterte nagsugod sa iyang pagpangayo og P10 milyones para sa iyang librong “Isang Kaibigan.” Ang minaldita niyang tubag sa pangutana ni Senador Risa Hontiveros unsay sulod sa libro niresulta sa pagkabisto sa daghang sayop sa libro. Ug sa mas dagkong problema sa paggasto sa iyang budget sa Office of the Vice President (OVP) ug Department of Education (DepEd).
Wala katabang ang iyang pagdumili sa pagtubag sa mga pangutana ug pag-insulto sa presiding officer ug sa mga sakop sa House Appropriations Committee.
* * *
O tingali ang tinuod nga pabilo mao ang iyang pagdumili sa pagtubag, hangtod karon, giunsa niya paghurot og gasto ang P125 milyones nga confidential funds sa OVP sulod lang sa 11 ka adlaw sugod sa Disyembre 21 hangtod sa Disyembre 31, 2022.
Wala katabang ang iyang pakig-away nilang House Speaker Martin Romualdez ug Presidente Ferdinand Marcos Jr. Bisan ang gibalikbalik nga pahinumdom nga kinadaghanan sa kasaysayan ang iyang 32 milyones ka mga boto sa 2022. Nga posible hinuong maoy nakapalangay sa administrasyon sa paglusad sa impeachment proceedings batok niya.
* * *
Mga timaan nga dili makapasabot si Duterte giunsa paggasto ang iyang P612.5 milyones nga confidential funds sa OVP ug DepEd maong nag-usab-usab nga mga panagang:
Adto ra siya motubag sa Commission on Audit (COA) dili sa Kongreso (ambot nganong walay nakasulti niya nga ang Kongreso dunay gahom sa pagsusi giunsa paggasto ang kuwartang ilang gigahin sa iyang mga upisina);
Wala siyay labot sa pag-andam sa acknowledgment receipts ug ubang mga dokumento nga gidudahan sa mga kongresista nga gimau-mao (dili siyang kapanghunaw og responsibilidad sa mga dokumento nga iyang gipirmahan);
* * *
Wala siyang kaseguro kon ang mga dokumentong giwara-wara sa House Committee on Good Government mao ba ang samang mga dokumento nga gisumiter sa OVP ug DepEd ngadto sa COA (hinaut kapamatud-an niya nga gisunod sa COA ug House ang taktika sa iyang amahan pagtanom og mga ebidensiya); ug
Dili siya katubag sa mga pangutana parte ni Grace Piattos ug ubang nakapirma sa walay pagbisto sa mga detalye sa intelligence operations (bugtong gihisgutan sa iyang mga dokumento maong Youth Leadership summits nga walay gasto ang DepEd).
* * *
- Latest
