Bisyo instrumento sa pagguba sa pamilya

Makapakitbi sa atay ang sunodsunod nga pagpamatay nga naglambigit ra usab sa pamilya, sama sa nahitabo sa Bacong, Negros Oriental diin giunay pagpusil patay sa amahan ang duha ka mga anak nga mga gagmay pa ug naghikog usab ang amahan, samtang ang inahan unang nakaikyas.

Samtang laing pagkutlo sa kinabuhi ang nahitabo sa syudad sa Carcar diin gipusil patay sa lalaki ang iyang kapuyo ug giapil pa ang 14-anyos nga dalagitang anak sa babayeng biktima. Nganong nahitabo kini? Una ang wala pagkasinabtanay sa mga nalambigit apan natahap ako nga gipabug-atan kini sa bisyo sa mga suspek sa illegal nga drugas kay kursonada naman kaayo nga mopatay sa ilang mahal sa kinabuhi.

Ang yawa ang naghari kanila diin ang bisyo sa illegal nga drugas ang gihimong instrumento aron mahitabo ang yawan-ong tinguha nila. Subo palandungon nga dunay mga pamilya ang naguba tungod kay gipalabi nila ang kangitngit sa ilang galamhan.

Ingon na ba ka grabe ang problema sa illegal nga drugas karong panahona? Sa tinuod lang, mas labaw pa kay nabanhaw naman ang mga tawo nga kanhi nangamatay na unta panahon ni PRRD nga mahadlok mopatim-aw segurado man nga tiwasan sila pagpuo. Lahi karon ang panahon kay mora’g hilom kaayo ang isyu sa illegal drugs nga maoy delikado. Atong sanglitanan ang dagko kaayo nga bulto sa illegal drugs nga masakmit sa mga otoridad nga multimillion pesos ang kantidad, kaniadto pinakete ra. Makapanglimbawot sa balhibo ang hilom nga kampanya sa illegal drugs kay basin usa ka adlaw niana mobuto kini ug dili na makontrolar ang anaa sa likod sa pagpakatap sa illegal drugs.

Kining mga nahitabong patay apil kini sa mga sinyalis kong unsa na ka gusbat ang utok sa mga tawong nihimo sa krimen. Nigara na ra ba ang mga durogista kay giseguro sa ubang magbabalaod nga protektado ang ilang katungod pastilan wala nay kwenta ang katungod sa mga mabiktima nila. Usahay makapangandoy kita nga mobalik ang panahon nga nitago ang mga dautan kay luwas ang katawhan gikan sa peligro nga posibleng dangatan.