Inutil nga mga alyado ni Sara
Kon nagkinahanglan si Bise Presidente Sara Duterte og pahinumdom nga dili niya kontrolado ang Senado, nga maoy mohusay sa articles of impeachment batok niya kon mapasaka sa House of Representatives, ang resulta sa tigom sa bicameral conference committee sa 2025 budget ang labing uwahing tamparos batok niya.
Bisan sa pasalig sa iyang mga alyado sa paghimo og determinadong pagsuway sa pagpalusot sa P2.037 bilyones nga budget nga maoy iyang gipangayo para sa sunod tuig, niinsistir ang mayoriya sa mga senador ug mga kongresista sa P1.3 bilyones nga laslas.
* * *
Ang nahibiling P733 milyones nga budget sa Office of the Vice President (OVP) mas dako gihapon kay sa P712 milyones nga gigahin sa Kongreso para sa OVP sa 2022, ang kataposang tuig sa termino ni kanhi Bise Presidente Leni Robredo.
Nakademalas ni Duterte mao ang mas daghang nahimo ni Robredo sa mas gamay’ng budget kay sa taphaw niyang mga proyekto nga gikuwestiyon pa gyod sa Commission on Audit (COA) tungod sa kapakyas niya pagpasabot sa mga transaksiyon. Bisan sa luag nga mga lagda sa paggasto sa iyang confidential funds.
* * *
Angayng ma-alarma si Duterte sa kapakyas sa iyang alyadong mga senador pagpanalipod sa iyang budget. Wala silay nahimo pagpanalipod sa OVP atol sa deliberasyon sa finance committee. Nagpabiling inutil sa debate sa plenaryo pagbaraw sa laslas sa iyang budget.
Mas makapa-alarma ang resulta sa botasyon sa plenaryo: Ni-aprobar sa budget ang 18 ka mga senador. Nga mao ang mayoriya nga gikinahanglan sa pagkonbikto niya kon mahinayon ug matiwas ang impeachment trial.
* * *
Gawas sa pagkapilde sa iyang budget, nga nagkahulogan nga mapugos siya pagtaktak sa 200 ka trabahante dungan sa pagkandado sa satellite offices sa OVP sa Sugbo ug ubang bahin sa Pilipinas, napakyas ang pagsuway nga kudeta batok ni Senate President Chiz Escudero.
Nga nagkahulogan nga wala mangiyugpos ang administrasyon sa pagpanalipod sa ilang mayoriya sa Senado. Sa ato pa, mahimong mas maglisod si Duterte sa pagkumbinser og walo ka senador sa pag-absuwelto niya. Kay dako ang kahigayonan nga mas agresibong mowara-wara ang Malakanyang og mas dagkong pork barrel nga magamit sa reelectionists sa ilang kampanya sa eleksiyon sa Mayo 12, 2025.
* * *
- Latest
