Inutil

Hugot nga gidili sa balod ang paggamit sa kwarta ug ubang kabtangan sa gobiyerno alang sa kampanya ug pagduso sa kandidatura ni bisan kinsa alang sa nagsingabot nga piniliay karong Mayo sunod tuig.

Ang Section 261 sa Omnibus Election Code naglatid sa mga kalihukan nga gidili ug lakip niini ang paggamit sa mga sakyanan sa gobiyerno. Apan bisan sa pagdili ug sa posibling kaso nga ilang atubangon duna gyuy ubang mga opisyal nga way kahadlok ug bisan kaikog nalang sa mga magbubuhis nga mopahimulos sa ilang katungdanan aron mamintaha.

Pananglitan, usa ka dump truck nga duna pay dakong logo sa dakbayan sa Sugbo ug pangan sa Barangay Sambag I ang nakuhaan og hulagway niadtong miaging semana nga gigamit aron kargahan sa mga campaign materials nilang Mayor Raymond Garcia ug sa iyang mga kauban sa partido.

Didto ni makit-i sa Barangay Tejero diin lakip sa nakuhaan og hulagway mao si Konsehal Jerry Guardo kang kansang asawa nga si Sambag I Barangay Captain Ailein Guardo kandidato pagkakonsehal ubos sa partido Kusug-Panaghiusa.

Ang magtiayong Guardo pulos nanghimakak nga ilang gigamit ang sakyanan sa gobyerno aron kargahan sa mga campaign materials bisan labihan ka klaro sa hulagway.

Si Mayor Raymond Garcia nanghunaw sab og kalambigitan niini. Matud niya nga dili na siya masayod giunsa paggamit sa barangay ang mga sakyanan nga hinatag sa syudad.

Posible tinuod nga wala gyud masayod ang mayor sa hitabo. Apan imposible nga molarga ang dump truck nga di mahibawo ang barangay. Ug imposible sab nga wala makakita si Konsehal Jerry Guardo nga maoy nagsupervise sa pagpanaod sa mga campaign materials nga sakyanan sa gobyerno ang ilang gikargahan.

Dili pud tingali bogo ang mga molupyo sa syudad nga motuo dayon sa iyang palusot. Apan taliwa sa dayag nga kalapasan ug tataw nga pag-abuso sa pwesto, way mapaabot ang publiko nga manubag niini.

Kini tungod kay ang mismong ahensiya nga gitahasan sa balaod paggukod sa mga malapason labihan ka inutil. Dihang gikuhaan og pamahayag ang regional director sa Comelec nga si Atty. Francisco Pobe igo lang ni nga miingon nga dili pa nila mahimong gukdon ang mga nagpahimulos sa kabtangan sa gobyerno alang sa ilang personal nga pamolitika.

Kini tungod kay wa pa kuno magsugod ang kampanya ug ubos sa balaod wa kunoy premature campaigning.

Ang pamahayag sa opisyal sa Comelec iyang giluwatan pila lang ka adlaw sukad siya miluwat og pahimangno sa mga incumbent nga opisyal nga mikandidato pag-usab alang sa umaabot nga eleksiyon nga dili mogamit sa mga sakyanan ug pundo sa gobyerno tungod kay kalapasan ni sa balaod.

Kun ingon niini ka inutil ang Comelec, dili na ta mahibulong kun nganong daghan sa mga opisyal ang way panaga nga molapas sa balaod. Ang bugtong paagi aron mapitol ang mga opisyal nga mapahimuslanon mao nga dili pasagdan sa publiko nga sila makalingkod pagbalik sa pwesto—ayaw og botar sa abusado ug mapahimuslanon.