Ingon nga

Diha sa atong pagsunod sa giisip natong mahinungdanong sanglitanan, dunay duha ka mga butang atong hinumdoman.

Mahimong gisunod nato siya ingon nga tawo ug mahimong sundon nato ang iyang mga tunob. Unsa may kalainan niini? Kun sundon nato ang tawo mahimong magkugi kita, nagmadasigon ug magmakanunayon apan kun siya wala na, kita usab maluya ug dili na makapadayon.

Sa laing bahin, kun atong sundon ang iyang mga tunob mahimo nga wala man siya physically apan magpabiling bililhon ang iyang mga pahimangno nga tungod niini bisan kun wala na siya padayon kitang nilihok segun sa iyang pagtulon-an ug padayong nahimong kabahin sa atong sistema. Bisan kun wala na ang atong giidolo padayon gihapon kita sa pagkugi ug panlimbasog.

Sa laing bahin, nindot kun atong hunahunaon nga atong gisunod ang maong tawo ingon man ang iyang pagtulon-an sa kapasikaran nga ato siyang gihigugma. Ug kun ang gugma maoy rason nan, mahimong mas makahuloganon ang matag panlimbasog. Bisan pa man sa bisan unsang dangatan sa maong pagsanong sa tawag sa pagka tinun-an anaa ang kalipay gumikan kay ang gitawag nahigugma sa nagtawag.

Sa atong pagsunod kang Kristo Jesus adunay rekisitos. Ang maong rekisitos naglangkob ning mosunod:

Paghikalimot sa kaugalingon. Wala kini magpasabot nga gikalimtan ang kaugalingon apan ang bisan unsang iya sa Diosnong Magtutudlo mao gyud unta ang priority. Matud pa ni Beato Francisco Palau: “Moadto ako kun bisan diin ang himaya alang sa Dios magtawag kanako!”

PAGPAS-AN SA KRUS

Ang krus sabton ingon nga responsibilidad resultado sa matang sa kinabuhi nga atong gipili. Nunot niini ang dakong sakripisyo nga mahimong atong masinati. Bisan pa man kun ang kalibutan allergic sa krus apan dili kita mamahimong tinun-an kun motalaw kita sa paghangop niini. Labaw na nga dili kita matawag nga Kristohanon kun wala ang Krus. Nunot sa pagpas-an sa krus ni Kristo mao man ang paghupot sa maya nga disposisyon.

Gikinahanglan ang JOY aron mamahimong mas gaan ang atong pagpas-an niini. Ang J alang kang Jesus nga sa ato pa, ang tanan atong gihimo tungod sa atong dakong gugma kang Jesus nga atong Ginoo.

Ang O kun others. Ang tanan atong gibuhat alang sa pangalagad sa uban. Sila kadtong mga Kristo Jesus dinhi sa yuta. Ang Y kun You mao ikaw o kamo. Ang Krus makapasantos kanato. Kini ang makapahingpit kanato.

Atong hinumdoman nga sa atong pagsunod kang Kristo Jesus anaa ang iyang saad nga siya magauban kanato hangtud sa katapusan sa kalibutan. Busa wala kitay angay nga kahadlokan.