Disyembre 09, 2024: Solemnidad sa Imaculada Concepcion ni Maria Santisima

Naandan gyud unta niini mao nga saulogon kining maong Solemnidad matag Disyembre 08 apan sanglit ang maong petsa natumong man sa adlaw nga Dominggo sa Adbiyente gibalhin kini sa Disyembre 9 ning tuiga.

Ang maong dogma nagtudlo nga sukad gipanamkon ang atong Mahal nga Inahan nahimo siyang walay buling sa sala nga panulondon sa kapasikaran nga siya ang tabernakulo sa Anak sa Dios nga Nagpakatawo.

Puno siya sa Grasya (cf. Lukas 1;28) Si Papa Pio IX niadtong tuig 1854 pinaagi sa Papal Bull Inefabilis Deus ang opisyal nga nibungat niini.

Mao kini ang nakapalahi nato gikan sa ubang mga denominasyon.

Usa kini ka lunsay nga Katolikong Pagtulon-an. Ang mahal nga inahan gitagana nang daan alang sa Dios nga mamahimong kahimanan sa atong kaluwasan.

Kun ang babaye (Eba) maoy hinungdan nganong nalingla kita sa bitin nga mao ang yawa, ang babaye usab ang gitagana nga maoy mopigsat sa ulo ning maong bitin (Maria) busa angayan lamang nga dili kita malisang kaniya anaa ang atong Inahan nga si Maria Santisima nga gipanamkon nga walay sala. Ave Maria!