Sinulog 2025

Balik sa na sa naandan nga Cebu City Sports Center ug sa kanhi rota ang Sinulog 2025 ubos sa pamunoan karon ni Mayor Raymond Alvin Garcia. Gihangop usab kini sa mga tawo ilabi na gyud niadtong mga negosyante sa palibot sa dapit nga maagian sa kalihokang kulturanhon nga nagmingaw intawon sulod sa duha ka Sinulogan dihang gipahigayon kini sa South Road Property SRP.

Ang pagbalhin sa venue sa Sinulog kaniadto maoy mitsa sa pagkasiloay sa maayong kabubut-on ni kanhi Mayot Mike Rama ug Governor Gwen Garcia dihang wala paminawa ni MLR ang panawagan n GFG nga ibalik sa CCSC ang Sinulog.

Sayon ang access sa mga manan-away sa Sinulog kay duol ra pud sa mga hotels ug tindahan ang kalihokan nga makab-ot ra sa kamot. Kini kong atong basehan ang kanhi selebrasyon. Apan duna koy kabalaka nga basin lahi na ang sitwasyon kay itandi sa nakalabay'ng katuigan.

Akong panag-ingnan ang lighting sa higanting Christmas tree sa Fuente Osmeña nga gidagsa sa bagang duot sa mga tawo nga napuno dili lang ang sulod kon dili sa gawas nga niawas sa mga tawo nga murag mini Sinulog ang feeling. Seguro tungod kay halos tanan tawo karon mga content creators na kinsa nagtinguha nga makakuha og video aron naay ika content sa social media ilabi na kadtong gihimong panginabuhi ang vlogging karon.

Gihugopan man gani ang giant Christmas tree unsa nalang kaha ang labing dako nga selebrasyon sa mga Sugboanon. Basin baya dili maigo sa mga karsada ang mga tawo nga manan-aw ug magkuha usab og video nga himoong content. Nagkadaghan ang mga tawo apan mao ra gihapon ang gigamyon sa mga karsada nga subayon sa mga contingents.

Kini ang angayan pangandaman sa LGU ug sa mga government agencies nga mahapsay ang pagbalik sa Sinulog sa sentro sa Cebu City. Basin sa sobrang kompiyansa makuratan nalang unya kong adunay mahitabo nga problema sama sa stampede sa mga manan-away.

Kong sa SRP luag ra man ang venue apan hilabihang inita ug layo kaayo alang sa mga manan-away ilabi na kadtong mga dunay special needs.

Sunod tuig este sunod buwan naman kini busa paaboton nalang natong tanan ang kasikas sa Sinulog 2025.