EDITORYAL - Mensahe sa China?

Niadtong nakalabay nga kaadlawon sa adlaw’ng  Miyerkules natugaw ang pagkatulog sa pipila ka mga residente dinhi sa Sugbu ug ingon man didto sa Mindanao sa nasaksihang gituohang nilang meteor shower nga nibagis sa mangitngit nga kalangitan.

Pipila ka mga netizens ang ni post og video bahin niini, dunay miingon nga ‘meteors’ o bulalakaw kini, apan duna say uban nga dili motuong meteor kay namatikdan man nilang wala kini nagpatibugsok sa yuta kondili padayon kining naglupad pataas.

Ang Philippine Space Agency (PhilSA)miklaro nga kini Long March 3B rocket sa China nga gipalupad gikan sa  Xichang Satellite Launch Center in Liangshan Yi autonomous prefecture sa Sichuan Province.

Gani miisyu og debris advisory ang PhilSA sa publiko nga dili puniton o mopaduol sa bisan unsang parte sa maong rocket nga matagak sa ilang lugar tungod sa peligro sa radiation, toxic  ug uban pa.

Ang ubang parte niini natagak sa sud sa teritoryo sa Pilipinas 12 nautical miles gikan sa Rozul Reef ug 151 NM gikan sa Busuanga, Palawan.

Human naklaro ang maong nikatap nga video nga usa ra ka rocket gikan sa China, nahilom na ang mga tawo.

Sa nanglabay nga mga adlaw sa miaging semana, gipublikar ang  gipalig-ong relasyon ug alyansa sa mga “like-minded nations” sa Pilipinas nga pabor silang kinahanglang mosunod ang China sa desisyon sa 2016 Arbitral Tribunal.

Gani dili palang dugay sab gihimo ang mga joint naval exercises sa Pilipinas kauban ang Japan, Australia ug US.  Nga nasundan pa sab og nagkalain-laing kalihokan sa kauban ang uban pang mga nasud sama sa South Korea ug uban pa.

Nahitabo ang maong rocket launch sa mga adlaw diin nibalik ang tensiyon diha sa West Philippine Sea sa dihang gibombahan napud sa Chinese Coast Guard ang mga barko sa Bureau of Fisheries and Aquatic Resources nga naghatud og supply ug nagpatrolya diha sa Scarborough Shoal.

Sa yanong mga tawo, walay kahulogan ang rocket launch apan sa mga nagtutok sa mga isyu bahin sa tension sa West Philippine Sea,  posibleng duna kini laing kahulogan ug mensahe kini gikan sa China nga nagpasidaan nga kaya niini abuton ang Pilipinas.