Collateral ang 4Ps

Mipalabang og ordinansa ang Sangguniang Panlalawigan sa Pangasinan nga nag-dili sa pagprenda sa Pantawid Pamilyang Pilipino Program (4Ps) cash cards isip collateral sa paghulam og kwarta. Pahamtangan usab og silot kadtong modawat sa maong 4Ps cash card isip collateral.  Dakong suliran kini’ng maong ordinansa sa mga tigpatanto.  Lisod man gani tinglon ang utang bisan kon adunay collateral, unsa na kaha kon wala?  Kay ginaingon baya nga, “Dili parehas ang kinaiya sa tawo sa panahon sa iyang pagpanghuwam ug sa panahon nga tingbayad na.”  Muleeng!

“Half-cup” batok “unli” rice

Gibuhi pagbalik sa Department of Agriculture ang panawagan niini alang sa usa ka nasudnong polisiya nga nag-awhag ug nagdasig sa mga restaurants ug mga food establishments nga modalit og half-cup rice aron malikayan ang pag-usik-usik niini.  Dili magkasinabot ang DA ug ang mga tag-iya sa restaurant niining maong hisgutanan kay managlahi man ang ilang katuyoan.  Sa habig sa DA, buot niini malikayan ang pag-usik-usik; sa habig sa mga negosyante, buot nila maka-kabig og daghang customer.  Matud pa sa akong amigo, “Mahimo kini nga gubat tali sa “half-cup” rice ug sa “unli” rice.”  Madahaan! 

Langayan ug temporaryo

Giawhag ni Senador Francis Tolentino ang Land Transportation Office (LTO) nga bakwion niini ang giluwatan nga Memorandum Circular No. VDM-2024-2721 nga nagdili sa pag-gamit sa mga temporary plates ug nga buhaton na niini ang mandato sa paghimo sa mga na-pending nga motorcycle plates sa unang quarter sa tuig 2025.  Dugang pa ni Tolentino, ang naghingapin nga backlog sa LTO makapahingawa nga timaan sa ka-inutil sa maong buhatan.  Maayo pa ilisan na lang ang kahulogan sa LTO.  Inay Land Transportation Office, himoon na nga “Langayan ug Temporaryo nga Opisina”.  Ateeer!

Anak sa liki sa kawayan

Gikataho nga adunay 15 ka mga puya nga bata nga anak sa mga nadakpan nga mga langyaw nga POGO workers ang giatiman karon sa Presidential Anti-Organized Crime Commission (PAOCC).  Usa kini ka wala damha nga sanga’ng suliran nga mibutho tungod sa POGO. Ang maong mga bata magdako nga stateless hangtod nga moabot na sila sa hamtong nga pangedaron diin makapili na sila sa ilang nationality.  Ni’ng kahimtanga, mora’g maingon nato nga aduna gyud diay mga “Anak sa liki sa kawayan.”  Fezteleern!

Mananom og kamunggay

Adunay giproponer nga balaodnon sa senado, ang Moringa Bill, nga gipangamahanan nila ni Senador Cynthia Villar ug Imee Marcos diin gihimug-atan ang potential sa moringa kon kamunggay, sa pagpausbaw sa sektor sa agrikultura ingon man sa health and wellness industry  sa Pilipinas.  Kon mapasar na ang maong balaodnon, aduna na unya’y dakong kahigayonan nga ma-export na ang kamunggay sa laing nasud.  Matud pa sa akong amigo, “Kon mahitabo, dili na unya kita sayon makapangayo’g kamunggay sa atong silingan.  Ingnon na lang unya ‘ta nga ‘Pananom mo’g inyo.”  Pagkatoytoy!