Makalibog

Ang hepe sa kapolisan sa Cebu City ipaimbestigar sa mga sakop sa Internal Affairs Service (IAS) tungod sa reklamo batok kaniya kabahin niadtong pagdakop niya kang Atty. Collin Rosell didto sa Cebu City Hall sa miaging Nobiyembre 8.

Si Police Colonel Joseph Elmer Bullong, officer-in-charge sa IAS Intelligence and Investigation Division sa Camp Crame, maoy mipahibawo niini ngadto sa mga abogado ni Atty. Rosell.

Tungod niini, ang suwat reklamo sa mga abogado ni Atty. Rosell gi-refer ngadto sa opisina sa Internal Affairs Service sa Police Regional Office-7 aron maoy mopahigayon og imbestigasyon kang Colonel Cañete.

Gawas kang Cañete duna pay ubang mga polis nga mapatawag pag-apil sa imbestigasyon kay kabahin sila sa midakop ni Atty. Rosell, kinsa giposasan ug gidala sa Waterfront Police Station.

Nangangkon ang mga abogado ni Atty. Rosell nga way basehanan ang pagdakop sa mga polis sa ilang kliyente kay wa kini gihimong kalapasan sa balaod ug naglingkod ra didto sa opisina sa mayor.

Gipasanginlan si Colonel Cañete nga nakahimo og Grave Misconduct ug Gross Neglect of Duty tungod sa pagdakop nila ni Atty. Rosell. Matud ni Colonel Bullong nga human sa imbestigasyon sa IAS, pasakaan og kaso si Colonel Cañete kon mapamatud-an nga nakahimo siya’g sayop.

Apan si Cañete daan na nga nangatarungan dihang nahinabi sa media nga ang pagdakop nila kang Atty. Rosell nagumikan sa reklamo ni City Administrator Kristine Batucan.

Mireklamo si Batucan kay si Atty. Rosell nagpatuo nga siya gihapon ang city administrator sa City Hall, ug gani miisyu pa og memorandum ngadto sa hepe sa Civil Security Unit.

Gihangyo unta sa mga polis si Atty. Rosell nga mobiya na sa opisina sa mayor, apan kay midumili man kini pagtuman, mao nga ila kining gitabangan sa pagposas ug gidala sa police station.

Samtang gipasakaan og kaso si Atty. Rosell ni city administrator Batucan, mibawos sab pagpasaka og kaso si Rosell batok sa abogada, ug iya pang giapil pagkiha si Cebu City Mayor Raymond Alvin Garcia.

Daghan ang wa kaayo makasabot niining mao nga isyu kay isi’g pangangkon sila si Mayor Rama ug Mayor Garcia nga sila maoy tinuod nga mayor sa siyudad.

Si Rama miingon nga bisan og may dismissal order ang Ombudsman kaniya, apan wa pa kini hingpit nga napatuman kay wa pa siya makadawat sa kopya sa desisyon sa kaso.

Apan si Garcia sab miingon nga ang paglingkod niya isip full-fledged mayor nagumikan sa order sa DILG nga moasumer na siya sa nabakanteng pwesto kay gi-dismiss na si Rama.

Maayo tingali nga dad-on kining maong isyu ngadto sa hukmanan aron ang huwes na maoy mohukom kinsa gyud ang ilhon nga tinuod nga mayor sa siyudad.