EDITORYAL - Hulga sa VP kang BBM?

Nagkadako ug nagkalawom na ang samad tali nilang Presidente Ferdinand Marcos Jr. ug Bise Presidente Sara Duterte-Carpio tungod kay naabot naman sa punto nga gustong ipapatay sa usa ang pikas.

Sa usa ka Zoom conference nga nigawas sa YouTube, si Sara namahayag nga duna na siyay giestoryahang tawo aron patyon silang Presidente Marcos, asawa niining si First Lady Lisa Araneta-Marcos ug si House Speaker Martin Romualdez.

Hinuon aduna kini kondisyon gikan sa bise presidente, buhaton lang kini kun siya ipapatay og una. Duna tingali siyay nadawat nga impormasyong dunay plano nga siya ipapatay. Si kinsa man ang gustong mopapatay niya?

Naunsa naman ning Pilipinas karon, nganong na-ingon man niini karon ang atong mga lider?  Kinsa may angay basulon? Kinsa may nagbutang ani nilang duha sa pwesto?

Unsa may kaayohang makuha sa Pilipinas gikan ani? Para sa unsa man? Para sa gahum? Para ni kinsa?

Ang video nga naa pa sa YouTube atol ning pagsuwat, giisip sa Presidential Security Commission nga seryuso ug gikonsiderar nila kini nga “active threat.”

Dili kini tiaw para sa mga Pilipino, si Sara sa maong video miklaro nga dili “joke” ang iyang gipanulti.  Tingali naa siyay nadawat nga impormasyon nga siya ipapatay.

Tungod sab sa maong video, ang presidential couple nahulga sab ang seguridad karon.

Daghan kaayong problema nga giatubang ang Pilipinas karon nga kinahanglang pangitaan og solusyon para sa kaayohan sa mga Pilipino.

Naay nagpabantang nga hulga gikan sa China diha sa West Philippine Sea nga daan nang nangimpluwensiya sa politika dinhi sa nasud aron maangkon ang maong teritoryo.

Mao nga  kinahanglanon kaayo ang panaghiusa sa mga ordinaryong Pilipino aron dili mabungkag ang nasud tungod lang sa personalay sa mga lider niini.

Dili lang unta magpagamit aning duha ka habig ang mga tawo nga moresulta hinuon sa kagubot sa nasud, makapakamang sa ekonomiya, maguba ang kahapsay ug kalinaw. Kay una sa tanan ang kaugmaon sa kabataang Pilipino maoy siguradong maapektahan kun moresulta sa bayolenteng kalihokan ang panagribal sa duha, unsa may mahitabo sa Pilipinas kun magkagubot?