Nindot sab og plataporma de gobiyerno ang Heal PH Partylist kay naglambigit kini sa isyu pag-atiman sa panglawas sa katawhan. Angay kini nga sundogon sa ubang mga politiko.
Sila si Dr. Jonathan Flavier (anak ni kanhi DOH Secretary ug Senador Juan Flavier) ug si Dr. Eric Tayag, kanhi Undersecretary sa DOH, maoy first ug second nominee sa maong Partylist.
Mibisita sila dinhi sa Sugbo kaniadtong Martes ug atol nga nakatambong ko sa ilang press conference nga gipahigayon sa OpenLine. Para kanako, nindot ang mga tawo nga adunay panglantaw sa pag-atiman sa maayong panglawas sa katawhan.
Didto nako masayri nga dako diay kaayo ang budget nga gitagana sa kagamhanan alang sa Department of Health (DOH), apan gamay ra kaayo sa maong kantidad ang gitugyan sa mga siyudad, lungsod ug probinsya alang sa pagserbisyo sa panglawas sa katawhan.
Angay kini nga kahimoan og kausaban. Kinahanglang hatagan og dakong kantidad ang mga Local Government Units kay gi-divolve na man ang mga health services.
* * *
Nalipay ko kay gipakatap na ni Koronel Antonietto Cañete ang daghang polis sa lainlaing dapit dinhi sa Dakbayan sa Sugbo. Wa gyud masayop si Mayor Raymond Alvin Garcia sa pagpili kang Cañete nga himoong full-fledged police director sa siyudad.
Mora’g gituman ni Koronel Cañete nga 85 percent sa gidaghanon sa mga police ipakatap gyud sa field ug gamay ra ang ibilin sa opisina. Unta, apilon pagdestino ni Koronel Cañete ang Natalio Bacalso Avenue paingon sa CIT University.
Diha sa Natalio Bacalso Avenue anha sagad moatake ang mga snatcher ug ang mga mabiktima di na lang tawon mo-report. Nalooy tawon ko sa usa ka babayeng pasahero sa jeep nga gilabnihan sa kwentas.
Wa tawon makatingog ang babaye ug nagpanghikap sa iyang liog kay gisakitan sa kalit nga paglabni. Nagkumpayot ang snatcher sa jeep, ug nagsige’g li-li ngadto sa mga pasahero sa sulod. Nagsunod ko samtang nag-drive sa akong sakyanan.
Paghunong gyud sa PUJ kay stop man ang signal light sa eskina Tres de Abril, nanaog ang nagkumpayot ug milipot likud sa naglingkod nga mga pasahero, ug gilabni ang kwentas.
Yano lang kaayo nga naglakaw ang snatcher nga daw sa way nahitabo. Wa gyuy kahadlok. Unta, maaksyonan kini ni Koronel Cañete. Gimingaw na ko sa mga panghitabo kaniadto nga dunay mga snatcher nga mapusilan sa polis.
Dili angay’ng kaluy-on kining maong matang sa mga tawo nga naghatag lang og dangan sa katilingban. Ang akong anak, biktima sa snatcher diha sa Natalio Bacalso Avenue kaniadto.