Pagdaginot ni Marcos Jr.
Apil sa abundang mga sukaranan sa awhag ni Presidente Ferdinand Marcos Jr. sa mga ahensiya sa gobiyerno sa dili pagpatuyang og gasto sa pagsaulog sa Pasko mao ang unom ka bagyo, tulo nila nahimong super typhoon, sulod lang sa usa ka buwan.
Atubangan sa lapad nga kalisod tungod sa katalagman nga wala kapangandami sa gobyerno, ug kakuwang og trabaho, kagamay sa suweldo ug kataas sa presyo sa mga palaliton nga wala masulbad sa administrasyon, dili tinuod angay nga usik-usikan ang dugang buhis sa katawhan sa pabusdik nga mga kumbira.
* * *
Pero may makasaysayanong mga sukaranan ang katawhan nga, gawas nga dili motuo, hilasan og Marcos nga maghisgot og pagdaginot. Labi na kon anak sa:
• Amahan nga ni-bangkarota sa nasudnong ekonomiya kay ni-garantiya sa utang sa iyang cronies nga gigamit dili para sa negosyo kon dili para sa ilang mga bisyo ug kapritso; ug
• Inahan nga nigamit sa mga ayroplano sa Philippine Airlines para sa panon sa blue ladies nga tig-abiba sa iyang shopping ug pagpabalik sa ayroplano nga nakalupad na sa Espanya kay nakalimot pagpalit sa iyang paboritong cheese.
* * *
Dili makatabang ni Marcos Jr. ang mga timaan kinsay iyang giliwatan:
• Gipalabing lumba sa mahalong mga sakyanan sa Singapore kay sa pag-unong sa mga biktima sa Super Typhoon Karding ug gigamit ang Gulfstream G280 sa Philippine Air Force sa Oktubre 2022; ug
• Samtang walay bugas nga makaon ug tubig nga mainom ang mga tripulante sa BRP Teresa Magbanua nga gihasi sa mga barko sa China sa Escoda Shoal sa West Philippine Sea, nigasto og P60 milyones sa pribadong konsiyerto sa Duran Duran sa Septiyembre ning tuiga.
* * *
Mas lisod tuohan ang awhag sa pagdaginot gikan sa presidente nga napakyas pagpa-barato sa bugas humay pero walay tihik-tihik ang gasto (ug ni-sekreto sa kinatibuk-ang gasto) paghimong mas luho sa Malakanyang:
• Sa niaging tuig, gipanindot ang Ceremonial ug Reception Halls, kusina, mess hall ug staff quarters sa palasyo; ug
• Karong tuiga, gibag-o ang Bahay Pangulo (kanhi Bahay Pangarap ni Noynoy Aquino ug Bahay Pagbabago ni Rodrigo Duterte) pinaagi sa pagtukod og unom ka istruktura–balay sa presidente first lady, gym, swimming pool, guest villa, pavilion-style reception hall ug staff quarters.
* * *
- Latest
