Nagkadaghan ang mga mendicants sa kadalanan

Komusta naman ang anti-mendicancy program sa dakbayan sa Sugbo? Nakasugod na ba kaha sila sa ilang gipasiatab nga monitoron kining maong problema ilabi na karong panahona nga nagsingabot ang pasko. Tataw man kaayo kining mga tawong naglaroylaroy sa kadalanan nga apil sa gitawag nila og mga mendicants. Misamot man gani sila kadaghan karon nga magsige og panguhit sa mga tawo kay mangayo lagi og pinaskohan kong dili ra ba tagdon mangasuko ang uban.

Usa sa akong kaila ang misaysay sa iyang kasinatian nga samtang nagbarugbarug siya sa daplin sa karsada kay naghuwat og masakyan, dunay lalaking mendicant ang nangayo niya og kwarta.

Apan tungod kay wala siya mohatag nasuko kini ug gisuwayan og ilog ang iyang gibitbit nga cellphone maayo nalang kay wala kini molampos apan natagak ang cellphone ug nadaut.

Maluoy man kita sa mga tawo nga angayan nga kaluy-on apan kining mga tawhana nga naa na nanginabuhi sa kadalanan makalagot pud kay baskog man sila nga makapanginabuhi man gyud unta og tarong inay magpakilimos.

Dihang nag-presscon ang anti-mendicancy board mora'g nalipay ko kay mahiluna na kining mga tawhana, kong gikan man sila sa laing dapit ug diri lang mga urban areas magpakilimos ug ilang masanta mahawanan na unta kining palibot sa ilang presensya.

Wala namay balita kong nakapahigayon ba sila og rescue operation aning mga tawhana. Basin baya og kutob lang sila sa presscon ug wala gyud nila buhata ang ilang giingon nga badlongon kining mga tawhana. Gigamit ra ba sa mga tawo ang mga gagmay'ng bata sa ilang pagkuha sa kaluoy sa mga tawo.

Mauwanan ug mainitan ang mga bata. Bisan og moingon kita nga anad na ning mga bataa kay mao ang ilang naandan apan mopatigbabaw man ang balaod nga nagprotehir sa katungod sa mga bata. Dili ba ni magamit sa mga otoridad sa pagpasaka og kaso batok niining mga tawhana?

Para nako kining grupoha sa mga tawo nga magpakilimos ug masuko ra ba kon dili hatagan mao ang unahon sa pagtutuok sa kagamhanan inay ang pagpangyo og permit niadtong lehitimong manaygonay kay lahi man ang mga carollers kay sa mga makililios.

Atol sa akong pagsuwat niining akong lindog wala gyud makuha kuhai ang mga tawo nga nisakay sa panahon sa Pasko nga dili ra motuo og Christmas apan kusog mamasko pastilan naman lang gyud.

Dili lang sa Cebu City apan apil usab ang mga silingang dakbayan gasaoysaoy kining mga tawhana nga mokapyot ra sa mga sakyanan de pasayrohan. Tibatiba ang kita nila mas dako pa seguro kay sa yanong mamumuo nga naghago sa pagtrabaho.

Huwaton nako kong tinud-on ba sa mga gisangonan sa dakbayan ang pagsumpo niining mga tawhana, dili man tanan sa ilang grupo kay in fairness sa ilang komunidad daghan man ang nagkugi nga mabuhi ang ilang pamilya.

Kong nahimo kini sa uban nganong dili man sila makahimo, nagpatigbabaw gyud ang ilang ka tapolan.