Online nga sugal

Daghan na nga sugal ang makita nato sa television ug social media sama sa scatter, online bingo ug uban pa.

Tungod niini, gidala na sa mga nagpasiugda sa sugal pinaagi sa pagtugot sa gobiyerno ang sugal sulod na mismo sa tagsa-tagsa nato ka panimalay o bisan asa ta mahimotang. Ingon ani ka sugarol ang mga Pinoy.

Ang gobiyerno milutos sa sugal nga illegal apan mitugot kini sa sugal. Maong makapangutana ko, nganong gilutos man sa gobiyerno ang illegal nga sugal? Tungod ba sa pagka illegal niini? Pero unsa man ang nakapa illegal niini?

Tungod kay wala kini gitugot sa gobyerno. Unsa man ang rason nga wala kini gitugot? Kay makadaut? Ang sugal nga gitugot dili diay makadaut? Dili ba daghan man nga milyonaryo ang napordoy kay napildi og minilyon sa casino? Wala diay makadaut sa kinabuhi sa mga milyonaryo ang sugal sa casino?

Ang gobiyerno tigpakaaron-ingnon. Batok kuno siya sa sugal pero siya ang pinakadakong sugarol. Tungod niini, iyang gigukod ang illegal nga sugal dili tungod kay nagpakabana kini sa mahitabo sa mga sugarol kun dili tungod kay ang illegal nga sugal nakigkompetensiya sa sugal nga gipasiugdahan sa gobiyerno.

Kun ugaling sayop ko sa akong pagtuo puwede kining pamatud-an sa gobiyerno pinaagi sa pagpahunong sa tanang matang sa sugal dinhi sa nasud ug sa pagbungkag sa PAGCOR o Philippine Amusement and Gaming Corporation usa ka Government Owned and Controlled Corporation nga maoy nagdumala sa tanang sugal sa nasud. Ang pagpahunong sa tanang sugal sa nasud ug pagbungkag sa PAGCOR dali ra kini nga mahimo ni Presidente Bongbong Marcos sama sa iyang pagpahunong sa operasyon sa POGO o Philippines Offshore Gaming Operators.

Bisan tuod og nanginahanglan pa og balaud nga ipalabang sa kongreso nga magbunkag sa PAGCOR sayon ra gihapon kini nga himoon sa Presidente tungod sa kadaghang kongresman ug senador nga tila sa Presudente. Dili seguro maglisod ang Presidente pagbungkag sa PAGCOR kun iya kining gustohon.