Bisan ang bagyo nawili

Namahayag ang PAGASA nga ang nagkahinay na unta nga bagyong Ofel nga migawas na unta sa Philippine Area of Responsibity (PAR), mibalik na usab pagsulod sa atong nasud.  Nagsunod -sunod ang bagyo nga midagmal sa Pilipinas karong bulana busa daw dili maayo ang maong balita.  Matud pa sa akong amigo, “Tungod sa atong kinaiya nga maabi-abihon (hospitable), ganahan gyud kaayo mamisita sa atong lugar si bisan kinsa, lakip na ang bagyo.”  Madahaan!

Panghilabot sa China

Mipadayag og pagsupak ang China sa laraw sa Pilipinas nga mopalit og mga Typhoon Mid-Range Capability missile system, ang matang sa armas nga gilusad sa Manila ni’ng bag-o lang sa Amerika.  Matud pa sa China, makapadangilag kini sa tensyon ug panagbangi sa rehiyon.  Pagpanginlabot na man sa internal nga polisiya sa Pilipinas ang pamahayag sa China.  Makapahinumdum sa akong higala’ng Bol-anon nga mipahimangno sa iyang ginikanan nga, “Nay ug Tay, Ajaw baja ninjo ibaligja ang kabajo nga puti’g tijan, kadtong nag-gujod og pajag.  Kay dili man ‘to injo, aho man to.”  Paglkatoytoy!

Mosukol gani ang hulmigas

Gisuportahan sa konseho sa dakbayan sa Sugbo ang kalihokan sa Land Recovery Task Force sa dakbayan aron matubag ang kakulang sa yuta ug ang backlog niini sa paghatag og mga relocation sites.  Kinahanglan nga panghingusgan ug tinud-od sa kagamhanan ang maong laraw bisan gituohan nga may masinati nga kalisod ang pagbuhat niini tungod kay posible’ng gipuy-an na ang maong mga luna sa mga squatters.  Kay matud pa bitaw, “Dili sayon ang hisgutanan sa illegal squatters, kay bisan ang mga hulmigas mosukol ug mamaak man gani kon imong papahawaon sa ilang balay-balay.” Maylainpa!

Natulog sa pansitan?

Giangkon ni Cebu City Councilor Noel Wenceslao, ang chairman sa finance committee sa Konseho, nga nasayop sila sa pag-aprobar sa budget sa dakbayan sa Sugbo nangaging tuig 2023 ug 2024.  Gihugon-hugon usab ang posibilidad nga laslasan sa konseho ang giproponer ni Mayor Garcia nga P17.9 billion nga budget alang sa tuig 2025.  Ang konseho usa ka colleaguial body busa maingon nato nga ang giangkon nga sayop ni Konsehal Wenceslao, sayop usab sa tibuok konseho.   Makita niini ang kamahinungdanon sa “check and balance” ug ang pagka-fiscalizer unta sa konseho.  Gawas na lang kon ang kadaghanan sa mga miyembro nagtinapulan o “nangatulog sa pansitan”.  Fezteleern!

Modaghan ang vlogger

Namahayag si Rep. Robert Ace Barbers, ang chairman sa quad committee sa Kongreso, nga dili mohatag ngadto sa International Criminal Court (ICC) ang quadcom sa mga kopya sa affidavit ug mga transcription sa testimonya sa mga affidavit sa mga testigos sa ilang imbestigasyon.  Dili na kuno obligado nga mohatag ang quadcom kay dili na man sakop sa ICC ang Pilipinas.  Labot pa, makita man sa mga social media ang nahitabo nga hearing.  Komentaryo sa akong amigo, “Modaghan unya ang likes ug follow sa i-post nga quadcom hearing.  Malingaw ug modaghan unya ang mga vlogger ni’ng kalakiha.”  Muleeng!