Raymond wa mahadlok

Dunay tawo nga wa magpaila nga mipasaka og kasong nepotism batok ni Cebu City Mayor Raymond Alvin Garcia kay kuno gi-hire sa iyang asawa ug gipatrabaho sa Cebu City government.

Klaro kaayo nga ang mipasaka og kaso batok ni Raymond nagtinguha nga mahisama kini kang dismissed Mayor Michael Rama nga gisilotan sa Ombudsman og dismissal sa pagka mayor.

Kami sa media, dugay ra nga nahibawo nga ang asawa ni Raymond nga si ma’am Kate Garcia nagtrabaho sa Cebu City government sa wa mahimong mayor ang iyang bana.

Apan nasayod sab mi nga dili si Raymond maoy nagpirma sa appointment papers ni ma’am Kate. Aron pagsiguro gyud, gitawag nako si Raymond, ug gikonpirmar niya nga si Rama ang nagpirma sa appointment papers sa iyang asawa.

Hinuon, diha kini gidistino sa opisina ni Raymond nga maoy vice mayor. Tungod niini, dili maigo si Raymond sa kasong nepotism kay ang maong kaso, malapas lang kon ang usa ka appointing authority mo-hire sa trabaho sa iyang suod nga mga paryente, apil ang asawa.

Nagkatawa si Raymond nga akong gitawag ug gipangutana, ug matud pa niya “Unsay pagtuo nila nako, bogo?” Klaro kaayo nga paukyab ra ang pag-file sa maong kaso batok kang Raymond.

* * *

Maghisgot ta ni kanhi Presidente Duterte. Miatubang si Duterte sa Quad Committee nga nag-imbestigar sa giingong Extra-Judicial killings atol sa administrasyon ni Duterte.

Sa wa pa magsugod ang hearing, gipasidan-an siya nga dili mamalikas kon mahimo siya’g pakigpulong, kay nasayod na ang katawhan sa baba ni Duterte. Pero, batasan gyud tingaling Duterte ang pagkahimalikas.

Si kanhi Senador Antonio Trillanes IV mihagit ni Duterte nga mopirma siya’g bank secrecy waiver aron nga magtugot sa mga tagdumala sa bangko nga mopagawas kini sa iyang mga bank records.

Pastilan, nasuko pag-ayo si Duterte, ug nangutana siya kon unsay bugti sa pagpirma niya’g waiver aron imatuod nga wa siya’y illegal wealth. Dayon, giingnan niya si Trillanes nga tamparuson atubangan sa mga kongresista.

Tan-aw nako mora’g misaka ang high blood ni Duterte ug wa na siya makapugong, nakalimtan na niya ang pahimangno nga dili mamalikas. Gilitok niya ang pulong “Lo_o” samtang isog kaayong naglantaw kang Trillanes nga naglingkod sa unahan.

Dayon, iyang gialsa ang table microphone ug gihana paglabay ngadto kang Trillanes. Maayo gani kay dunay tawo nga diha sa iyang tupad nga mipugong sa iyang bukton.

Pastilan, mora’g tan-aw nako dili maayong himoong senador si Digong kay madali siya’g kamatay kay pirmi nga mosaka ang iyang high blood pressure kay di man siya kapugong sa iyang kalagot kon masuko.

Si Trillanes wa magpadala, kalma ra kaayo nga naglingkud ug wa gani motan-aw kang Duterte.